Nexia-3 haydovchisi rul boshqaruvini yo‘qotib, beton to‘siqqa borib urilishi natijasida yong‘in kelib chiqqan.
Bugun, 31-oktyabr kuni Toshkent shahar Yunusobod tumanida Nexia-3 avtomashinasi yonib ketgani aks etgan video ijtimoiy tarmoqlarga sizdirildi. Ushbu holat yuzasidan Toshkent shahar IIBB YHXB Matbuot xizmati ma’lumot berdi.
Joriy yilning 31-oktyabr kuni soat 21:50 atrofida Yunusobod tumani Ahmad Donish ko‘chasida Nexia-3 haydovchisi 2004-yilda tug‘ilgan A.A. rul boshqaruvini yo‘qotib, beton to‘siqqa borib urilishi natijasida yo‘l-transport hodisasi sodir etgan.
Ushbu YTH natijasida avtomashinada yong‘in yuzaga kelib chiqqan. Yong‘in tuman FVB xodimlari tomonidan bartaraf etilgan. YTH natijasida tan jarohat olganlar bo‘lmagan.
Mazkur hodisa yuzasidan YHXB hamda FVB xodimlari tomonidan surishtiruv harakatlari olib borilmoqda.
