Inspektor o‘z oila a'zolarini qasddan o‘ldirib, o‘z joniga qasd qildi

Bo‘stonliq tumanida yashovchi profilaktika inspektori 6-avgust kuni soat 21:00 larda turmush o‘rtog‘i bilan o‘rtalarida kelib chiqqan o‘zaro kelishmovchilik sababli dahshatli qotillik va o‘z joniga qasd qilish hodisasini sodir etdi.

Qayd etilishicha, kelishmovchilik davomida inspektor o‘ziga biriktirilgan «PM tabel» quroli bilan turmush o‘rtog‘i va 2024-yilda tug‘ilgan o‘g‘il farzandiga o‘q uzib, ularni qasddan o‘ldirgan. Keyin esa, u o‘zining jinoiy qilmishlaridan qutilish maqsadida «PM tabel» quroli bilan bosh qismidan bir marotaba o‘q uzib, o‘z joniga qasd qilgan.

Mazkur holat yuzasidan Bo‘stonliq tumani prokuraturasi tomonidan O‘zbekiston Respublikasi Jinoyat Kodeksining 97-moddasi bilan jinoyat ishi qo‘zg‘atilib, dastlabki tergov harakatlari olib borilmoqda.

Bu hodisa hududda katta shov-shuvga sabab bo‘ldi va ko‘plab savollarni keltirib chiqardi. Profilaktika inspektorining o‘z qurolidan foydalangan holda bunday qilmishni sodir etishi jamoatchilikning e'tiborini tortmoqda va huquqni muhofaza qilish organlari tomonidan qo‘shimcha xavfsizlik choralarini ko‘rishga undamoqda. Dastlabki tergov natijalari va hodisaning sabablari haqida qo‘shimcha ma'lumotlar e'lon qilinishi kutilmoqda.