Toshkent shahar hokimining Mirzo Ulug‘bek, Sergeli, Shayxontohur, Chilonzor, Yashnobod hamda Yakkasaroy tumanlarida renovatsiya loyihalarini amalga oshirish va shu maqsadda hududlarning chegarasini belgilash haqidagi qaroriga O‘zbekiston «Adolat» SDP munosabat bildirdi.
Partiyaning qayd etishicha, bu kabi renovatsiya jarayonlari ko‘pincha aholi yashab kelayotgan turar joy binolari va boshqa ijtimoiy ob'ektlarni buzish va qayta qurishni talab etadi. Bu esa, fuqarolarning eng muhim konstitutsiyaviy huquqlari bo‘lgan uy-joyli bo‘lish va mulkdor bo‘lish huquqlariga to‘g‘ridan-to‘g‘ri daxl qiladi.
Aynan shu sababli, konstitutsiyada shaharsozlik hujjatlarining loyihalari jamoatchilik muhokamasidan o‘tkazilishi belgilab qo‘yilgan. Binobarin, hokimlik va tegishli mutasaddi tashkilotlar bu borada har qanday qaror chiqarishdan oldin aholi bilan maslahatlashuvlar o‘tkazishi lozim edi.
“Partiyamiz uy-joy bilan bog‘liq bunday loyihalar mustahkam qonuniy asosga tayanishi, uy-joy mulkdorlarining huquq va manfaatlari renovatsiyaning har bir bosqichida qonun bilan ishonchli himoya qilingandagina samarali amalga oshirilishi mumkin, degan qat'iy fikrda. Aks holda fuqaro quruvchi-investor bilan yakka tashlab qo‘yilgan holatda uning huquqlari ta'minlanishiga hech qanday kafolat yo‘q. Biz uzoq bo‘lmagan tariximizdagi «snos» degan salbiy hodisa misolida bunga ko‘p bora guvoh bo‘ldik.
Qolaversa, Toshkent shahrining Bosh rejasi tasdiqlanmay turib bunday loyihalarni amalga oshirish maqsadga muvofiq emas”, — deyiladi munosabatda.
Ayni paytda, qonun loyihasini va renovatsiyaga oid loyihalarni tayyorlashda jamoatchilik bilan har tomonlama muhokama jarayonlarini tashkil qilish, ayniqsa, renovatsiya taklif etilayotgan hududlardagi aholiga huquqlarini batafsil tushuntirib borish, shuningdek, renovatsiya tadbirlarini amalga oshirishda turar joy egalarining huquq va manfaatlarini ustuvor bilish hamda to‘liq muhofaza qilish shart, demoqda partiya.
“Binobarin, O‘zbekiston «Adolat» sotsial-demokratik partiyasi tegishli qonun qabul qilinmaguniga qadar renovatsiyaga oid har qanday loyihalarni zudlik bilan to‘xtatish kerak, deb hisoblaydi”, — deydi O‘zbekiston «Adolat» SDP.
