Ko‘proq uyqu, kamroq telefon. Xitoy o‘quvchilar stressini kamaytirmoqchi

Xitoy Ta’lim vazirligi tomonidan e’lon qilingan tashabbuslar quyidagilarni o‘z ichiga oladi: sinflarda mobil telefonlardan foydalanishni taqiqlash va internetga haddan tashqari tayanishni kamaytirish uchun ekransiz vaqtni joriy etish.

Maktablar boshlang‘ich va o‘rta sinf o‘quvchilari uchun uy vazifalarining umumiy miqdorini qat’iy nazorat qilishi va har bir maktab kunida kamida ikki soat jismoniy faollikni ta’minlashi kerak.

Shuningdek, maktablar o‘quvchilarning yetarli uxlashini ta’minlash uchun kelish va ketish vaqtlarini maqbul tarzda tashkil etishi va tushlik tanaffuslariga yetarli vaqt ajratishi tavsiya etiladi.

“Uyquni boshqarish qoidalarini qat’iy bajarish, haddan tashqari o‘qishni qat’iyan cheklash va ortiqcha akademik yuklarni oldini olish zarur”, deyilgan vazirlik bayonotida.

Bu choralar o‘quvchilarga stress va xavotirga, ayniqsa imtihonlar paytida, bardosh berishda yordam berish uchun mo‘ljallangan.

Ma’lumot uchun, Xitoy maktablarida og‘ir uy vazifalari keng tarqalgan bo‘lib, bu uyquning yetarli bo‘lmasligi, xavotir va depressiya darajasining oshishiga olib keladi.

Ta’lim vazirligi oktyabr oyida e’lon qilgan alohida xabarda esa o‘qituvchilarning ish yukini kamaytirish maqsadida ularning maktabdan tashqari vazifalari cheklanishi, dam olish kunlari va bayramlarda ishlashga ruxsat berilmasligi aytilgan.

2021 yilda Xitoyda qabul qilingan ta’lim qonuni uy vazifalarini kamaytirishni nazarda tutgan va asosiy fanlar bo‘yicha maktabdan keyingi repetitorlikni taqiqlagan edi. Biroq ko‘plab ota-onalar bolalariga Xitoyning juda raqobatbardosh ta’lim tizimida ustunlik berish maqsadida repetitorlik xizmatlarini izlashda davom etmoqda.