Sun’iy intellekt bo‘yicha AQSH yetakchilik qilmoqda, Xitoy ikkinchi o‘rinda

Sun’iy intellekt bo‘yicha AQSH yetakchilik qilmoqda, Xitoy ikkinchi, Buyuk Britaniya uchinchi o‘rinda. Ushbu baho Xitoy ilmiy va texnologik axborot instituti va Pekin universiteti tomonidan tayyorlangan Global sun’iy intellekt innovatsiyalar indeksi hisobotida berilgan.

Hisobot Shanxayda bo‘lib o‘tgan sun’iy intellekt bo‘yicha Butunjahon konferensiyasida taqdim etildi. Uning mualliflari 46 mamlakatni beshta mezon asosida o‘rgangan: asosiy yordam, resurslar va rivojlanish muhiti, ilmiy va texnologik tadqiqotlar va ishlanmalar, sanoat va innovatsiyalarni qo‘llash, xalqaro hamkorlik va almashinuv. Mamlakatlar 39 ta ko‘rsatkich bo‘yicha tahlil qilindi, ularning har biri uch bosqichli tizim yordamida baholandi.

Hisobotga ko‘ra, AQSH va Xitoy sun’iy intellekt sohasida katta farq bilan yetakchilik qilmoqda. Tadqiqotchilarning ta’kidlashicha, bu mamlakatlar sun’iy intellekt chiplari, yuqori malakali mutaxassislar, yetakchi ilmiy jurnallardagi maqolalar va yirik sun’iy intellekt modellarini ishlab chiqaruvchi kompaniyalarning aksariyat qismini tashkil qiladi.

AQSH 100 balldan 77,97 ball, Xitoy 58,01 ball, Buyuk Britaniya 36,60 ball to‘pladi. Kuchli o‘nlikka, shuningdek, Yaponiya (33,77), Koreya Respublikasi (33,48), Germaniya (32,22), Singapur (31,57), Fransiya (30,98), Kanada (29,79) va Hindiston (29,41) kirdi. Rossiya 17,49 ball bilan 30-o‘rinni egalladi.

Bu yil 26-28 iyul kunlari Shanxayda sun’iy intellekt bo‘yicha Butunjahon konferensiyasi bo‘lib o‘tadi. U 2018 yildan beri har yili o‘tkazib kelinmoqda. Ushbu platforma Shanxayda sun’iy intellekt sohasidagi yirik sanoat rahbarlarini birlashtiradi. Unda yirik kompaniyalar rahbarlari, hukumat vakillari, olimlar va ekspertlar ishtirok etadi. Ular aloqa o‘rnatadi va sun’iy intellekt texnologiyalarini yanada rivojlantirish va qo‘llashni muhokama qiladi, deb xabar beradi tass.ru.