Yaponiya va AQSH yetakchilari fevralda uchrashmoqchi
02.02.2025 11:25
Yaponiya bosh vaziri Sigeru Isiba va AQSH prezidenti Donald Tramp o‘rtasidagi birinchi uchrashuv 7-fevral kuni Vashingtonda bo‘lib o‘tishi mumkin. Hozirda ikki davlat hukumatlari ushbu masala bo‘yicha yakuniy muzokaralarni olib bormoqda.
Uchrashuvdan ko‘zlangan asosiy maqsad - Yaponiya va AQSH o‘rtasidagi ittifoqchilik munosabatlarini mustahkamlashdan iborat. Ikki davlat mudofaa va xavfsizlik sohasidagi hamkorlikni mustahkamlash, shuningdek, Xitoy va Shimoliy Koreya bo‘yicha qo‘shma pozisiyani shakllantirishdan manfaatdor. Bundan tashqari, Yaponiyaning Nippon Steel kompaniyasi U.S. Steelni sotib olish rejasi bilan bog‘liq iqtisodiy masalalar ham muhokama qilinadi.
Tramp Yaponiyadan mudofaa xarajatlarini oshirishni talab qilishi mumkin, Isiba esa o‘z hukumatining shu yo‘nalishdagi yangi siyosatini tushuntirmoqchi. Shuningdek, u Yaponiya AQSH iqtisodiyotining asosiy sarmoyadori ekanligini va sarmoyalarni kengaytirish rejasini taklif qilmoqchi ekanligini ta’kidladi.
“Biz bu uchrashuvni imkon qadar tezroq o‘tkazmoqchimiz. Ochiq muloqot orqali biz ittifoq munosabatlarini yangi bosqichga ko‘taramiz”, - dedi Isiba.
