– Bizda shaxmat taxtasi shaklidek tartiblangan, uylar aralashib ketgan qishloqlar bor, – dedi davlat rahbari “Kabar” agentligiga bergan intervyusida. – Bu masalani hal qildik. Chegarani qo‘riqlash har ikki tomon uchun jiddiy noqulaylik tug‘dirayotgan edi. Endi biz tomondagi Tojikiston fuqarolari uylari va xuddi shunday ularning hududidagi qirg‘izistonliklar ko‘chiriladi. Albatta, bu jarayonda hovlilarning maydoni, har bir metr joy hisobga olinadi.
Japarov davlatlar o‘rtasidagi chegara masalasi amalda hal etilgani, hozir hujjatlarni rasmiylashtirish bo‘yicha ikki tomonlama ish olib borilayotganiga ham to‘xtalgan:
– Jarayon nihoyasiga yetgach, tegishli hujjatni hukumatlararo komissiya, so‘ngra tashqi ishlar vazirlari imzolaydi. Keyin bitim ikki davlat parlamentlari tomonidan ratifikatsiya qilinadi. So‘ngra kelishuvni biz –Prezidentlar imzolaymiz. Notalar almashilgach, ikki-uch yil demarkatsiya amaliyoti davom etadi. Shundan keyingina ish to‘liq yakuniga yetgan hisoblanadi. Eng muhimi, ikki tomonlama kelishuvga erishdik.
Ma’lumki, qariyb ming kilometrga cho‘zilgan Qirg‘iziston va Tojikiston chegarasining ayrim joylari hali delimitatsiya qilinmagani, o‘rtada noaniq hududlar mavjudligi tufayli vaqti-vaqti bilan mahalliy aholi, ikki davlat chegarachilari o‘rtasida mojaro chiqib turadi.
O‘tgan yil dekabr oyi boshida Qirg‘iz Respublikasi Milliy xavfsizlik davlat qo‘mitasi rahbari Qamchibek Tashiyev tojikistonlik hamkasbi Saymo‘min Yatimov bilan uchrashgach, Bishkek va Dushanbe davlat chegaralari bahsli hududlari bo‘yicha yakuniy kelishuvga erishilgani ma’lum qilingan. O‘shanda chegara chizig‘ini qonuniy rasmiylashtirish bir necha oy davom etishi ta’kidlangan.
