Pokiston sudi bugun sobiq bosh vazir Imron Xon va uning rafiqasi Bushra Bibini Al-Qodir universiteti ishiga aloqadorlikda ayblab, qamoq jazosiga hukm qildi.
"Anadolu" agentligining yozishicha, Imron Xonni 14 yil, rafiqasini esa 7 yillik qamoq kutmoqda. Bundan tashqari sobiq bosh vazirga 1 million pokiston rupiysi (3500 dollar) rafiqasiga esa shu summaning yarmiga teng miqdorda jarima ham qo‘llangan.
Avvalroq Imron Xon “Al-Qodir” ishi bo‘yicha Milliy hisobot byurosi tomonidan hibsga olingandi.
Shuningdek, iqtisodiy razvedka Imron Xon, uning rafiqasi va muxoliftadagi «Tehrik-i-Insaf» partiyasi yetakchilariga nisbatan tergov boshlagan edi. Tergov ma’lumotlariga ko‘ra, ular birgalikda «Al-Qodir universiteti»ni yaratish bo‘yicha uyushma tashkil etishgan va bu Pokiston byudjetiga 50 milliard rupiy miqdorida zarar yetkazgan.
