Uch davlat bosh vazirlari uchrashdi

08.01.2025 15:23

Bugun, 8-yanvar kuni Farg‘ona viloyatining O‘zbekiston, Qirg‘iziston, Tojikiston davlat chegaralari tutashgan nuqtada uch mamlakat hukumatlari rahbarlari boshchiligidagi delegatsiyaning uchrashuvi bo‘lib o‘tdi.

Tomonlar ushbu uchrashuv uch mamlakat Davlat rahbarlari – O‘zbekiston Respublikasi Prezidenti Shavkat Mirziyoyev, Qirg‘iz Respublikasi Prezidenti Sadir Japarov va Tojikiston Respublikasi Prezidenti Emomali Rahmon o‘rtasida hamkorlik va mintaqaviy integratsiyani mustahkamlash maqsadida davlat chegarasi masalalari bo‘yicha avval erishilgan kelishuvlar doirasida o‘tkazilayotganini ta’kidladi.

"Mazkur uchrashuv xalqlarimizni birlashtiruvchi uch davlat chegarasi tutashgan hududda o‘tkazilgani ramziy ma’noga ega. Boisi, Davlatlarimiz rahbarlarining kuchli siyosiy irodalari va konstruktiv munosabatlarga asoslangan siyosatlari tufayli mintaqada do‘stlik hamda yaxshi qo‘shnichilik, ko‘p qirali aloqalar mustahkamlanib, yangi pog‘onaga ko‘tarildi. Ayni paytda, Markaziy Osiyo tinchlik va farovonlik hududi ekani amalda o‘z ifodasini topmoqda", — deyiladi O‘zbekiston Respublikasi hukumati portalida.