Janubiy Koreya prezidenti lavozimidan chetlatildi

Sakkiz nafar sudyadan iborat Konstitutsiyaviy sud hay’ati hukm chiqarish jarayonida prezident o‘z qarori bilan mamlakat Konstitutsiyasini, qonun ustuvorligi va demokratiya tamoyillarini buzganini ma’lum qildi. Endi mamlakatda 60 kun ichida yangi prezidentlik saylovi o‘tkazilishi kerak.

O‘tgan yil dekabr oyida Yun mamlakatda harbiy holat e’lon qilishga uringan edi, biroq bu urinish muvaffaqiyatsiz yakunlangan. Shundan so‘ng parlament uni isyon uyushtirishga urinishda ayblab, prezidentga impichment e’lon qildi.

Yun Sok Yol prezidentlik vakolatlarini bajarishdan chetlashtirilgandi, biroq lavozimidan butunlay chetlatilishi uchun Konstitutsiyaviy sud qarori talab etilar edi. Shu vaqtgacha Yun Sok Yol rasmiy ravishda Janubiy Koreya prezidenti bo‘lib qolayotgandi.

Yun o‘ziga qo‘yilgan isyon uyushtirish ayblovlarini rad etib, bu “siyosiy jihatdan o‘ylab qilingan qaror” bo‘lganini, uning maqsadi esa, hukumat ishini falaj qilgan muxolifatdan davlatni himoya qilish bo‘lganini aytgan.

Konstitutsiyaviy sud majlisi boshlanishidan oldin Janubiy Koreya politsiyasi Yunning tarafdorlari va muxoliflari o‘rtasida to‘qnashuvlarning oldini olish uchun “bor imkoniyatlarni safarbar qilganini” bildirgan.

Sudyalarga esa qo‘shimcha xavfsizlik chorasi ta’minlangan.