O‘zbekiston keyingi Olimpiadada kuchli o‘ntalikka kirishi kerak

O‘zbekiston Prezidenti Shavkat Mirziyoyev sport sohasidagi masalalar muhokama etilgan kengashda mutasaddilarga shunday topshiriq berdi. Buning uchun hukumatning mas’ul a’zolaridan tortib, tuman va qishloq hokimlarigacha ishni tizimli tashkil etish majburiyati yuklandi.

Yig‘ilishda Shavkat Mirziyoyev sport federatsiyalari raislari va respublika tashkilotlari rahbarlarining faoliyatini tanqid qildi. Xususan, mutasaddilar va murabbiylar o‘rtasida aloqa yo‘q. Uning oqibatlari sportdagi past natijalarga olib kelmoqda.

O‘tgan yili Parij Olimpiadasida O‘zbekiston terma jamoasi umumjamoa hisobida 13-o‘rinni egallagan edi. Shu bilan birga, Sh.Mirziyoyev Fransiyadagi natijalar bilan qanoatlanmaslik kerakligini ta’kidladi.

Bu kamchiliklarni bartaraf etish maqsadida har bir viloyatda Milliy olimpiya qo‘mitasining filiallari ochiladi. Bundan tashqari, hududlarda sportchilarni saralash uchun raqamli platforma yaratiladi. 4 yillikning asosiy musobaqasiga tayyorgarlikni kuchaytirish maqsadida zarur infratuzilmani yaratishga 300 milliard so‘m (23 million dollarga yaqin) yo‘naltiriladi.