Istanbulda 70 kishi qalbaki alkogoldan halok bo'ldi
10.02.2025 10:27
Istanbulda 70 kishi qalbaki spirtli ichimlikdan halok bo‘lgan, ulardan 23 nafari O‘zbekiston fuqarosi.
Yanvar o‘rtalaridan fevral oyi boshigacha Istanbulda 70 kishi qalbaki spirtli ichimliklarni iste’mol qilish oqibatida halok bo‘lgan, 150 dan ortiq kishi tibbiy yordam so‘rab murojaat qilgan. Bu haqda shahar rahbari Dovut Gul ma’lum qildi.
“14-yanvardan 6-fevralgacha Istanbulda 70 kishi qalbaki spirtli ichimliklar ichish oqibatida vafot etdi, 150 dan ortiq kishi kasalxonaga yotqizildi”, — degan u.
Alkogolli mahsulotlarni noqonuniy ishlab chiqarish va muomalasiga qarshi kurashish tadbirlari davomida 190 nafar shaxs aniqlanib, ulardan 11 nafari qo‘lga olingan. Shuningdek, rasmiylar 86 ming litrdan ortiq metil va etil spirtini musodara qilgan.
Avvalroq O‘zbekistonning Istanbuldagi Bosh konsulligi halok bo‘lganlar orasida 23 nafar O‘zbekiston fuqarosi borligi haqida xabar bergan edi.
.webp&w=3840&q=75)
