Telegram asoschisi Pavel Durovga qarshi Fransiyada ochilgan jinoyat ishi sudga kamida bir yil yoki undan ko‘proq vaqt o‘tmasdan topshirilmaydi. Bu haqda Fransiya prokuraturasi vakili Maylis de Rek maʼlum qildi. Uning so‘zlariga ko‘ra, hozircha biror kelishuv muhokama qilinayotgani yo‘q.
Maʼlumotlarda Durovning Fransiyada qolib ketgani va Telegram messenjeri uning "ajralmas yetakchisi" almashtirilishini kutayotganini taʼkidlaydi. Fransiya huquq-tartibot idoralari Telegramning jinoyatlarni tergov qilish bo‘yicha so‘rovlariga javob bermagani sababli bir nechta tergovlar to‘xtab qolganini aniqlagach, Durovni hibsga olishga qaror qilishgan.
Fransiya politsiyasi 2013-yildan 2024-yilgacha Telegramga yuborilgan 2460 ta huquqiy so‘rov javobsiz qolganini qayd etgan. Telegramning sobiq hukumatlar bilan aloqalar bo‘yicha rahbari Yuliya Konlining aytishicha, Durovni platformadagi barcha voqealar uchun javobgar qilish “noo‘rin” va u bunga "loyiq emas".
Pavel Durov 2024-yil 24-avgustda Parijdagi Le Burje aeroportida hibsga olingan. Unga uyushgan jinoyatchilik bilan bog‘liq jinoyatlar, jumladan, giyohvand moddalar savdosi va bolalar pornografiyasini tarqatishda hamtovoqlik hamda organlarning so‘rovlariga maʼlumot bermaslik ayblovlari qo‘yilgan. Durov bir necha kundan so‘ng 5 million yevro garov evaziga ozod qilingan va politsiyada muntazam ro‘yxatdan o‘tish majburiyati yuklangan. Shundan beri u Parijda qolmoqda. Dekabr oyida bo‘lib o‘tgan dastlabki tergovda Durov so‘nggi olti oy ichida Telegram huquq-tartibot idoralari bilan faol hamkorlik qilganini va turli mamlakatlar hukumatlariga o‘n minglab foydalanuvchilarning maʼlumotlarini taqdim etganini aytgan.
Ushbu ish platforma egalari va rahbarlarining foydalanuvchilar tomonidan sodir etilgan noqonuniy harakatlar uchun javobgarligi masalasini ko‘taradi. Bu esa internetda so‘z erkinligi va xavfsizlik o‘rtasidagi muvozanatni taʼminlash bo‘yicha muhim muhokamalarga sabab bo‘lmoqda.
.webp&w=3840&q=75)
