Boku 2024-yil 25-dekabr kuni Qozog‘istonning Aqtau shahri yaqinida «Ozarbayjon Havo Yo‘llari» (AZAL) aviakompaniyasiga tegishli yo‘lovchi samolyoti halokatga uchragani munosabati bilan Rossiyaga qarshi xalqaro sudga da’vo arizasi tayyorlamoqda. Bu haqda Ozarbayjon davlat axborot agentligi APA xabar berdi. Aviahalokat natijasida samolyot bortidagi 67 kishidan 38 nafari halok bo‘lgan, 29 nafari esa tirik qolgan edi.
«Hozirda huquqiy dalillar bazasi shakllantirilmoqda, fakt va isbotlar yig‘ilmoqda», – deyiladi xabarda.
Ozarbayjon rasmiylari Qozog‘iston transport vazirligi aviahalokat bo‘yicha dastlabki hisobotni e’lon qilganiga qaramay, Rossiya tomoni voqeani «muhokama qilishda biryoqlama yondashuv» namoyon qilayotganidan norozi. Bokuga ko‘ra, «Rossiya rasmiy shaxslari, mutaxassislari va OAV o‘zlarining bu voqeaga aloqadorligini rad etishda va aybni ekipajga ag‘darishga urinishda davom etmoqda». Ozarbayjon rasmiylari bu uslubni 2014-yili Donbass osmonida Rossiyaning «Buk» zenit-raketa tizimi bilan urib tushirilgan Malayziya Boeing 777 samolyoti voqeasiga o‘xshatmoqda.
APA agentligining yozishicha, Ozarbayjon hukumati AZAL samolyotiga otish buyrug‘ini bergan shaxslar, amalga oshirilgan zarbalar va qo‘llanilgan qurol haqida aniq ma’lumotlarga ega.
Avvalroq Ozarbayjon hukumati Rossotrudnichestvo agentligi, xususan Bokudagi Rossiya madaniyat markazi (Rus uyi) rahbariyatiga uning faoliyatini to‘xtatish haqida rasmiy xabar yuborgan edi. Bu haqda mahalliy Report.az nashri manbalariga asoslanib xabar bergan. Rossiya Tashqi ishlar vazirligi Rus uyi bilan bog‘liq vaziyatni hal qilish ustida ish olib borayotganini bildirdi. Agentlik rahbari Yevgeniy Primakovning ta’kidlashicha, Rus uyi bir yarim oy ichida ijaraga olingan binodan chiqishi kerak, chunki uning egasi binoni shoshilinch ravishda sotib yubormoqchiligini aytgan.
.webp&w=3840&q=75)
