Husanovning Angliyadagi maoshi ma'lum bo'ldi

O‘zbekiston milliy terma jamoasi va “Manchester Siti” klubi himoyachisi yangi klubga o‘tganidan so‘ng eng ko‘p maosh oladigan o‘zbekistonlik futbolchiga aylandi.

Futbolchining agentiga yaqin bo‘lgan manba, insayder Narzulla Saydullayev kuni kecha o‘zining Telegramdagi sahifasida Abduqodir Husanovning yillik maoshi miqdorini ma’lum qildi. Unga ko‘ra, markaziy himoyachining “Shaharliklar” safidagi yillik maoshi taxminan 3,5 million yevroni tashkil qiladi. Bundan kelib chiqadiki, futbolchining oylik maoshi 290 ming yevroni, haftalik maosh 67 ming yevroni, kunligi esa 9,5 ming yevroni tashkil qiladi. 

Shu tariqa Abduqodir Husanov eng ko‘p maosh oladigan o‘zbekistonlik futbolchiga aylandi. Bungacha o‘zbekistonliklar orasida eng ko‘p maoshli futbolchi Eldor Shomurodov sanalib, uning Rim klubi bilan 2026-yilga qadar imzolangan shartnomasiga ko‘ra, Eldorning yillik maoshi 2 mln. yevroni tashkil qilishi haqida xabarlar tarqalgan.