O‘zbekistonda kuniga 10 ming qadam yuradigan fuqarolar yana rag‘batlantiriladi. Bu "O‘zbekiston - 2030" strategiyasini "Atrof-muhitni muhofaza qilish va "yashil" iqtisodiyot yili"da amalga oshirishga oid davlat dasturi to‘g‘risida"gi prezident
Farmonida nazarda tutilgan.
Hujjatga ko‘ra, Ekologiya vazirligi va Raqamli texnologiyalar vazirligiga "Bir million yashil oila" umummilliy harakati doirasida bir kun ichida kamida o‘n ming qadam bosib o‘tishni targ‘ib qilishni nazarda tutuvchi platformani ishga tushirish topshirildi. Platforma 2025-yil 1-iyungacha ishga tushirilishi kerak.
Yuqori ko‘rsatkichlarga erishgan shaxslarga "ekofaol fuqaro" maqomi beriladi. Ularga davlat xizmatlaridan foydalanishda, shuningdek, banklardan iste’mol krediti olishda (davlat ulushi 50 foizdan ortiq bo‘lgan) 10 foiz miqdorida chegirmalar taqdim etiladi.
Voyaga yetgan barcha a’zolariga "ekofaol fuqaro" maqomi berilgan oilalarga har yili lotereya orqali 14 ta elektromobil beriladi. Bunday oilalarga ham "yashil oila" maqomi beriladi.
Aholisining yarmi "yashil oila" maqomiga ega bo‘lgan mahallalarda "Eng toza mahalla" va "Eng yashil mahalla" tanlovlari o‘tkaziladi. Bolalar maydonchalari qurish, yashil bog‘chalar tashkil etish, chiqindi maydonchalari qurish, chiqindi konteynerlarini o‘rnatish uchun g‘olib mahallalar jamg‘armasiga 500 million so‘m yo‘naltiriladi.
Eslatib o‘tamiz, 2020-yil oktyabr oyida prezident farmoni bilan mamlakatda "Sog‘lom turmush tarzi" platformasi (1hls.uz) yaratilgan edi. Fuqarolar bir kun davomida 10 ming va undan ortiq qadam tashlagani uchun elektron hamyonga 3000 so‘m olgan. 2022-yil may oyida bu amaliyot bekor qilingan edi.
