Bu reja shahar faollari va ekologlar orasida jiddiy norozilik uyg‘otdi. Shu sababdan ular petitsiya imzolash tashabbusini boshlashdi.
Avvalroq aynan shu guruh faollar 2021-yilda “Moviy gumbazlar” bog‘ini qurilishdan saqlab qolishga muvaffaq bo‘lishgan. Endi esa navbatdagi yashil hududni yo‘q bo‘lishdan himoya qilish maqsadida harakat boshlandi.
Petitsiyani imzolash uchun fuqarolar 17-fevraldan boshlab bir hafta davomida har kuni soat 10:00 dan 20:00 gacha Anhor bog‘idagi “Karting” klubining birinchi qavatiga tashrif buyurishlari mumkin. Ushbu tashabbus ekobloger Mo‘tabar Xushvaqtova boshchiligida
tashkil qilingan. Faollar bog‘ni saqlab qolish uchun jamoatchilikning faolligiga tayanmoqda.
Shaharning markaziy qismidagi ushbu bog‘ o‘rnida massiv qurilish amalga oshirilishi bir qator ekologik va shaharsozlik muammolarini keltirib chiqarishi mumkin, deb
yozmoqda ekobloger Mo‘tabar Xushvaqtova. Daraxtlar yo‘q qilinsa, avvalambor, shahardagi chang va ifloslanish darajasi oshadi, havo harorati esa ko‘tariladi. Anhor daryosi bo‘yida tabiiy yashil zona mavjud bo‘lishi uning atrofida mikroiqlim yaratib, havo namligini me’yorda ushlab turadi. Agar bu hudud betonlashsa, Toshkentda o‘zi shundog‘am issiq o‘tadigan yoz fasli yanada chidab bo‘lmas darajaga yetadi. Prognozlarga ko‘ra, daryo bo’yida qurilish suvning bug’lanishini oshiradi, yer osti suvlarining tabiiy balansini buzadi, natijada, bu Anhorning tabiiy oqimiga salbiy ta’sir ko‘rsatishi mumkin.
“Anhor-Lokomotiv” bog‘i 2016-yilda ko‘ngilochar park sifatida ochilgan. Keyinchalik, 2019-yilda uning yonida “Navro‘z” etnoparki tashkil etilgan bo‘lib, u hunarmandlar ustaxonalari va charxpalak bilan boyitilgan edi. 2022-yilda esa bog‘ 376,5 milliard so‘m qiymat bilan auksionga qo‘yilgan, lekin sotilmagan.
So‘nggi yillarda shaharning yirik bog‘lari birin-ketin qurilish maydonlariga aylanganiga guvoh bo‘lib kelmoqdamiz. “Moviy gumbazlar” bog‘i uchun olib borilgan kurash muvaffaqiyatli yakunlangandi, ammo bu – istisno. Endi esa“Anhor” bog‘ining kelajagi xavf ostida turibdi. Ekofaollarning ogohlantirishicha, agar shahar markazidagi bog‘lar ketma-ket buzilaveradigan bo‘lsa, Toshkent tez orada betonsimon “issiqxona”ga aylanadi.
