«Shenchjou-19» ekipaj a’zolari Say Syuychje va Son Lindun eng uzoq ochiq kosmosda bo‘lish bo‘yicha yangi jahon rekordini o‘rnatdilar. 2024-yil 17-dekabrda taykonavtlar «Tyangun» kosmik stansiyasida ochiq kosmosda 9 soat 6 daqiqa vaqt o‘tkazishdi.
Sakkiz soatu 56 daqiqalik avvalgi rekord 2001-yil 12-martda amerikalik astronavtlar Jeyms Voss va Syuzan Xelms tomonidan o‘rnatilgan edi.
Xitoyning «Tyangun» kosmik stansiyasi Yer atrofida 340-450 kilometr balandlikda aylanadi, bu taxminan XKS orbital balandligi bilan bir xil.
Xitoy ommaviy axborot vositalarining yozishicha, Say va Son ochiq kosmosda bir qancha muhim vazifalarni bajargan. Ular kosmos chiqindilaridan himoya qilish moslamalarini o‘rnatdilar va tashqi jihozlarga texnik xizmat ko‘rsatdilar, shu jumladan issiqlik nazorat qilish tizimi uchun kabellar va quvurlarni kosmos chiqindilari natijasida yuzaga kelishi mumkin bo‘lgan shikastlanishdan himoya qilishadi.
Stansiya ichidan ularga uchinchi ekipaj a’zosi Van Xaochje yordam berdi. Yerdagi nazorat guruhlari va stansiyaning robot manipulyatorlari ham missiyaning muvaffaqiyatini ta’minlashda muhim rol o‘ynadi, deya xabar beradi Xitoy OAVlari.
Taykonavtlar uzoq vaqt davomida fazo kemasidan tashqari faoliyatni qo‘llab-quvvatlash uchun mo‘ljallangan ikkinchi avlod «Feytyan» skafandrlaridan foydalanganlar.
Ekipaj kosmik stansiyaga oktyabr oyi oxirida yetib borgan va 2025-yil aprel oyi oxiri yoki may oyi boshida qaytib, Ichki Mo‘g‘ulistonga qo‘nishi rejalashtirilgan.
