Maʼlum qilinishicha, 2024-yilda messenjerda jami 15,3 millionta guruh va kanallar bloklangan.
“Telegram har kuni oʻn minglab guruhlar va kanallarni bloklaydi hamda uning xizmat koʻrsatish shartlarini buzuvchi millionlab kontentni, jumladan, zoʻravonlikka chaqiriqlar, bolalarga nisbatan zoʻravonlik materiallarini tarqatish va noqonuniy mahsulotlarni sotish kabilarni oʻchirib tashlaydi”, deyiladi xabarda.
Joriy yil davomida bolalarga nisbatan jinsiy zoʻravonlik mavzusiga oid materiallarni oʻz ichiga olgan deyarli 702 ming guruh, shuningdek, terrorchilik faoliyati bilan bogʻliq boʻlgan 129 mingga yaqin guruh va kanallar bloklangan. Terrorizmga oid 100 milliondan ortiq kontent olib tashlangan.
Telegramʻning maʼlum qilishicha, 2015-yildan beri moderatsiya jarayoni foydalanuvchilar shikoyatlarini qabul qilish bilan bir qatorda mashinali oʻrganishga asoslangan faol monitoringni oʻz ichiga olgan. Bu yil esa sunʼiy intellektga asoslangan moderatsiya vositalari joriy etilgan.
Telegram asoschisi Pavel Durov Fransiyada messenjerda yetarlicha moderatsiya yoʻqligi va rasmiylar bilan hamkorlik qilishdan bosh tortganlikda ayblanib, 24-avgust kuni Parij aeroportida qoʻlga olingan edi. U Telegram orqali bolalar pornografiyasi, firibgarlik va boshqa jinoyatlarni tarqatishda gumon qilingan. Tadbirkor 5 million yevro garov va haftasiga ikki marta politsiya boʻlimiga xabar berish majburiyati evaziga qoʻyib yuborilgan.
6-dekabr kuni Durov bu ish boʻyicha birinchi marta soʻroq qilindi. Telegram oʻz hisobotida kontentni moderatsiya qilish va sud organlari bilan hamkorlik qilish amaliyotini amaldagi Fransiya qonunchiligiga qatʼiy muvofiq ravishda olib borayotganini taʼkidladi. Shuningdek, kompaniya kontentni tekshirish uslubini takomillashtirayotgani hamda moderatsiya jamoasini kengaytirayotganini qayd etgan.
