Intellektual mulk obyektlariga oid mulkiy huquqlarni buzganlik uchun jinoiy javobgarlik belgilanyapti.
Bu haqda Oliy Majlis Qonunchilik palatasining Innovasion rivojlanish va axborot texnologiyalari masalalari qo‘mitasi tomonidan intellektual mulk himoyasini kuchaytirishga qaratilgan qonun loyihasi nazarda tutilmoqda, deya xabar beradi Qonunchilik palatasi axborot xizmati.
Qayd etilishicha, qonun loyihasi dastlabki tarzda ko‘rib chiqilmoqda. U bilan Jinoyat, Jinoyat-prosessual, Ma’muriy javobgarlik to‘g‘risidagi va Fuqarolik kodekslariga mualliflik huquqi va turdosh huquqlarni, shuningdek, sanoat mulki obyektlariga bo‘lgan huquqlarni buzganlik uchun javobgarlikni kuchaytirishni nazarda tutuvchi tegishli o‘zgartirish va qo‘shimchalar kiritish taklif etilmoqda.
Xususan, intellektual mulk obyektlariga doir shaxsiy nomulkiy huquqlarni buzganlik uchun amaldagi qonunchilikda nazarda tutilgan javobgarlik choralari kuchaytirilmoqda. Bunday obyektlarga oid mulkiy huquqlarni buzganlik uchun jinoiy javobgarlik belgilanyapti.
Qonun loyihasi siyosiy partiyalar fraksiya yig‘ilishlari muhokamasiga kiritish uchun tayyorlanmoqda.
