Endi yakshanba kunlari ta’til to‘lovlarida hisobga olinmaydi.
Prezident Shavkat Mirziyoyev 13-fevral kuni Mehnat kodeksiga o‘zgartirish va qo‘shimchalar kiritish to‘g‘risidagi qonunni imzoladi.
Yangi tartibga ko‘ra, endi yakshanba kunlari mehnat ta’tili davomiyligi va uning uchun to‘lanadigan mablag‘ hisob-kitobida inobatga olinmaydi. Bu qoida foydalanilmagan ta’tillar uchun pul kompensatsiyalariga ham tatbiq etiladi.
Haq to‘lanmaydigan ta’tilning umumiy muddati 12 oylik davr ichida 3 oydan oshmasligi kerak. Ilgari bu cheklov ta’tildan so‘ng kelgusi bir yillik davrga taalluqli edi.
16 yoshgacha bo‘lgan nogiron farzandi yoki 12 yoshgacha bo‘lgan ikki va undan ko‘p bolasi bor ota-onalar hamda vasiylar uchun ish haqi saqlanmaydigan ta’til muddati eng ko‘pi bilan 14 kun etib belgilandi (avval kamida 14 kun edi).
Ushbu o‘zgarishlar mehnat ta’tili bilan bog‘liq qoidalarni aniqlashtirish va tizimni yaxshilashga qaratilgan.
