Vazirlik 2025-yilda maktablarda oʻquvchilar uchun darsliklar ijarasi boʻyicha ijtimoiy tarmoqlarda tarqalgan xabarlar yuzasidan munosabat
bildirdi.
Qayd qilinishicha, 2024-yilda maktab oʻquvchilari uchun 83,2 million nusxa darslik va mashq daftarlarini yetkazib berish uchun davlat budjetidan jami 1,5 trillion soʻm ajratilgan. Ushbu mablagʻlardan 435,5 milliard soʻmi (yoki 36 foizi) davriyligi 1 yil hisoblanadigan hamda har yili yangidan chop etiladigan mashq daftarlari uchun yoʻnaltirilgan.
2025-yilda esa 81 mln nusxa darsliklar va mashq daftarlari uchun jami 1,3 trln soʻm mablagʻlarni toʻliq Davlat budjetidan qoplash koʻzda tutilgan.
Shu bilan birga, ijtimoiy tarmoqlardagi faol foydalanuvchilar tomonidan chop etilgan postlarda Budjet loyihasida Kitob jamgʻarmasi xarajat va daromadlari koʻrsatilmaganiga eʼtibor qaratilgan. Qayd etish joizki, Kitob jamgʻarmasi faoliyati toʻxtatilgan va yangi jamgʻarma tashkil qilinmagani sababli loyihada bu boʻyicha maʼlumotlar aks ettirilmagan.
2025-yil uchun Davlat budjeti doirasida koʻzda tutilgan mablagʻlar yangi oʻquv yilida oʻquvchilarni darsliklar va mashq daftarlari bilan taʼminlash boʻyicha ehtiyojni toʻliq qoplash imkonini beradi.
Bunda, ota-onalardan darsliklar va mashq daftarlari ijarasi uchun qoʻshimcha toʻlov undirish rejalashtirilmagan.
