Ijtimoiy tarmoqlarda Farg‘ona viloyatida avtomobil yo‘lining bir qismi o‘pirilib tushgani, hodisa oqibatida yo‘ldan o‘tayotgan «Damas» chuqurga ag‘darilib ketgani tasvirlangan videolar tarqaldi. Viloyat FVB holat yuzasidan ma’lumot berdi.
Bildirilishicha, joriy yilning 23-fevral kunidan 24-fevral kuniga o‘tar kechasi Farg‘ona viloyati Bag‘dod tumani «Qaxat» MFY hududidan o‘tgan D-105 «Farg‘ona halqasi» avtomobil yo‘lining 286-kilometrida favqulodda hodisa yuz bergan. Yo‘lning o‘ng tomonidan oqib o‘tuvchi Farg‘ona kanalida suv sathi ko‘payib avtomobil yo‘lining tag qismidan sizib o‘tishi oqibatida asfalt yo‘l qoplamasida cho‘kish yuzaga kelgan.
Farg‘ona viloyati Avtomobil yo‘llari bosh boshqarmasi matbuot xizmatiga ko‘ra, mazkur hududda ta’mirlash ishlari olib borilayotganligi sababli vaqtincha transport vositalari harakati cheklangan. Cheklov vaqtida ushbu hududni aylanib o‘tishlik uchun 40V 047 «Bag‘dod-Dasht- Ultarma» (Qo‘qon-Farg‘ona) va 40V 046 «Yangi qo‘rg‘on-Ultarma-Qaqir» (Farg‘ona-Qo‘qon) avtomobil yo‘llari orqali harakat tashkil etilgan.
Qo‘shimcha qilinishicha, ta’mirlash ishlari 24-fevral kuni soat 18:00 ga qadar yakunlanib, transport vositalarining harakati qayta yo‘lga qo‘yilishi rejalashtirilgan.
«Ushbu cheklov vaqtida tirbandliklar hosil qilmay aylanma yo‘llar orqali harakatlanishingizni so‘rab qolamiz», deyiladi tegishli tashkilotlar munosabatida.
.jpg&w=3840&q=75)
