Jurnalist Anora Sodiqova “Mufasa” taxallusi bilan tanilgan bloger Mirsaid Haydarovga qarshi sudga
murojaat qildi.
Murojaatda u bloger tomonidan ijtimoiy tarmoqlarda va anonim kanallarda uning sha’nini, qadr-qimmatini va ishchanlik obro‘sini kamsituvchi ma’lumotlar tarqatilganini ta’kidlagan. Shikoyat O’zbekiston Respublikasi Fuqarolik Kodeksining 100-moddasi (Sha’n, qadr-qimmat va ishchanlik obro‘sini himoya qilish) asosida fuqarolik sudiga yuborilgan.
O‘tgan yilning 9-fevralida 20 dan ortiq jamoat faollari O‘zbekiston Respublikasi Bosh prokuraturasiga, O‘zbekiston Respublikasi Prezidenti Administratsiyasining Axborot xavfsizligi Departamentiga va boshqa organlarga O’zbekistondagi internet-trollik, tuhmat va haqoratlar yuzasidan murojaat qilishgan, deb xabar bermoqda huquqshunos Abdurahmon Tashanov.
“Bizning murojaatlarimiz O‘zbekiston Respublikasi Ichki ishlar vazirligining Kiberxavfsizlik boshqarmasiga ko‘rib chiqish uchun yuborildi. Kiberxavfsizlik xodimlari faollar bilan uchrashib, “Jo‘qqi jurnalistlar” va “Telegraf” telegram kanallari, shuningdek, Facebook’dagi o‘nlab anonim profillar haqida mulohazalarimizni eshitishdi. Shundan so‘ng tergovoldi surishtiruvlar boshlandi. 20 dan ortiq faollar Ichki ishlar vazirligiga chaqirilib, jabrlanuvchi sifatida ko‘rsatmalar berishdi. Biz tergovchilar bilan shubhali shaxslar va dastlabki versiyalar haqida fikr almashdik”, — deyiladi xabarda.
Tashanovning so‘zlariga ko‘ra, Bosh prokuratura va Davlat xavfsizlik xizmati ushbu trolling kampaniyalariga va ularning noqonuniy faoliyatlariga aloqasi yo‘qligini rasmiy ravishda bildirgan.
“Jarayon davomida yuqorida tilga olingan anonim profillar va kanallar faoliyati deyarli to‘xtadi, biz o‘z ishimizni davom ettirdik. Biroq, keyinchalik trolling yana qayta faollashdi. Biz hali ham Prezident Administratsiyasi, Bosh prokuratura va Kiberxavfsizlik boshqarmasidan rasmiy javoblar olmadik. Endi biz bu davlat organlarining fuqarolarning murojaatlariga nisbatan qonunchilikni buzganligi yuzasidan ma’muriy sudlarga da’vo arizalarini tayyorlayapmiz. Biz Anorani sudda qo‘llaymiz. Ehtimol, katta natijalarga erisha olmasligimiz mumkin, ammo biz vaziyatni maksimal darajada yoritishga harakat qilamiz”, — deydi Tashanov.
Tashanovning so‘zlariga ko‘ra, tarmoqda #qoyalar_va_soyalar deb nomlangan chellenj boshlangan. “Biz barcha faollarni amaldagi qonunchilikka rioya qilishga, milliy manfaatlarni hisobga olib, qadriyatlarimizga hurmat bilan yondashishga chaqiramiz. Nur va soya kurashi — bu abadiy jarayon”, — deb yozgan u.
