Yirik korxonalar shahardan tashqariga ko‘chiriladi

Tegishli farmon O‘zbekiston prezidenti Shavkat Mirziyoyev tomonidan imzolangan.

Hujjatga ko‘ra, 1-maydan boshlab yirik shaharlar va viloyat markazlarida asbest, syement ishlab chiqarish, teri-ko‘nchilik va parrandachilik fabrikalari, metallurgiya zavodlari, kimyo sanoati korxonalarini ochish taqiqlanadi.

Bundan tashqari, 1-oktyabrga qadar O‘zbekiston hukumati Toshkent va Nukus shaharlarida hamda viloyat markazlarida joylashgan, atrof-muhitga katta zarar yetkazuvchi va ko‘p miqdorda elektr energiyasi iste’mol qiladigan korxonalarni bosqichma-bosqich ko‘chirish rejasini ishlab chiqadi.

Ekologiya vazirligidan ma’lum qilishlaricha, Toshkent, Nukus va viloyatlar markazlaridagi zararli ishlab chiqarishlarning shahar tashqarisiga ko‘chirilishi ekologik vaziyatni yaxshilashga xizmat qiladi.