O‘zbekiston Somali bilan diplomatik aloqalar o‘rnatdi
06.02.2025 13:58
Mazkur davlat O‘zbekiston bilan diplomatik munosabatlar o‘rnatgan 157-mamlakatga aylandi.
Nyu-York shahrida O‘zbekiston va Somali o‘rtasida diplomatik munosabatlar o‘rnatish to‘g‘risidagi Qo‘shma kommyunike imzolandi.
Hujjatni O‘zbekistonning BMTdagi doimiy vakili Ulug‘bek Lapasov va Somalining BMTdagi doimiy vakili Abukar Dahir Usmon imzoladi.
Tomonlar xalqaro tashkilotlar, jumladan, BMT va uning ixtisoslashgan institutlari doirasida hamkorlikni kuchaytirishga tayyor ekanliklarini tasdiqladilar.
Siyosiy, savdo-iqtisodiy va madaniy-gumanitar sohalarda hamkorlikning o‘zaro manfaatli yo‘nalishlarini topish maqsadida ikki tomonlama aloqalarni faollashtirish bo‘yicha kelishuvga erishildi.
Somali Federativ Respublikasi O‘zbekiston bilan diplomatik munosabatlar o‘rnatgan 157-davlatga aylandi.
Ma’lumot uchun, O‘zbekiston 2024-yilda Afrika, Amerika va Yevropaning 12 ta davlati bilan diplomatik munosabatlar o‘rnatgan.