Eng oddiy misolni keltiradigan bo‘lsak, 2024-yilda chiqarilgan filmlarning 30 tasi deyarli bir xil yoki nisbatan o‘xshash nom bilan namoyish etilgan. Demak, kinoga nom topish ham borgan sayin qiyinlashmoqda.
Quyida kino olamidagi eng qiziqarli faktlardan bir nechtasini keltirib o‘tamiz.
Eng og‘ir kiyim
Kinolarda nafaqat syujet, balki aktyorlarning kiyinishi, tashqi ko‘rinishi ham muhim ahamiyatga ega. Ba’zida aktyorlar o‘zlari uchun noqulay kiyimlarda rol o‘ynashiga to‘g‘ri keladi. “G‘aroyib odamlar: Apokalipsis” filmida aktyor Oskar Isak 20 kilogrammga teng bo‘lgan kiyimda rol ijro etishga majbur bo‘ladi va bu aktyordan sabr va mashaqqat talab etadi. Ammo bu rekord darajadagi og‘ir kiyim emasdi. 1938-yilda chiqarilgan “Mariya Antuanetta” filmida aktrisa Norma Shirer 50 kilogrammlik kiyimda rol o‘ynashiga to‘g‘ri kelgan.
Eng ko‘p halok bo‘lgan aktyor
“Uzuklar hukmdori”, “Taxtlar o‘yini” kabi seriallar bilan ko‘pchilik kino ixlosmandlariga tanish bo‘lgan Shon Bin o‘zi gavdalantiradigan qahramonlarining kino davomida halok bo‘lishidan zerikib ketganini aytgan.
“Oxirgi loyihalardan birida prodyuserlar aytib qolishdi: «Biz seni o‘ldirmoqchimiz». Shu zahoti javobini berdim: «E, yo‘q, yigitlar, bunaqasi ketmaydi!». Keyin ular «Unda senga jiddiyroq jarohat yetkazsak bo‘ladimi?» deb so‘rashdi. Men esa bunga rozi bo‘ldim. Mana bu boshqa gap, har holda tirik qolamanku», — degandi aktyor 2019-yilda. O‘sha paytda Shonning 23 ta filmdagi qahramonlari qurbon bo‘lgandi. Ammo bu angliyalik iste’dod egasining xafa bo‘lishiga arzimaydi. Chunki boshqa bir ingliz aktyori Kristofer Li ijro etgan obrazlar 61 marta “o‘ldirilgan”. Ya’ni Li deyarli shuncha marta “o‘lib ko‘rgan” yoki o‘lish sahnasini o‘ynab bergan.
Eng katta tabiiy portlash
Aksariyat jangari filmlarda portlash sahnalarini namoyish etish uchun grafikalardan foydalaniladi. Ammo rejissyor Sem Mendes hammasi tabiiy ko‘rinishini istagan va “Spektr” filmidagi Jeyms Bond va Madlen Svanning qochish sahnasi uchun 33 kg portlovchi modda va 8400 litr kerosinni portlatib yuborgan. Deyarli 8 soniya davom etgan ushbu portlash kino tarixida grafikasiz suratga olingan eng katta portlash hisoblanadi.
Eng ko‘p ishlatiladigan rekvizit
Yuqorida yozganimizdek, kinoda turli rekvizitlar ham alohida ahamiyatga ega. Shu sababdan AQSHning Los-Anjeles shahrida bir qancha rekvizit kompaniyalari bor. Ana shunday kompaniyalardan biri ishlab chiqaradigan rekvizit kino tarixida eng ko‘p marotaba foydalaniladi deb topilgan. Bu qandaydir soat, mashina, qurol yoki boshqa narsa emas, oddiy gazeta. Filmlarda gazeta o‘qiyotgan qahramonlar sahnasini ko‘p ko‘ramiz. Aynan Los-Anjelesdagi kompaniya esa “The Recurring Newspaper” yoki “Qayta takrorlanadigan gazeta”ni bosib chiqaradi va bu nomdagi gazeta 10 mingdan ortiq filmlarda foydalanilgan. Ushbu gazetaning birinchi sahifasi bo‘sh holatda chop etiladi, film egalari xohishiga qarab unga istalgan yozuv yoki suratni tushirishi mumkin. Qolgan sahifalar esa tasodifiy so‘zlar va iboralar bilan to‘ldiriladi.
Eng omadsiz oy
