Oʻzbekistonda ham elektromobillar ancha ommalashdi va hozirda eng koʻp sotilayotgan, haridorgir elektromobillardan biri BYD avtomobillari boʻlib turibdi. Xitoyda bu elektromobillardan har yili 4-4,5 million dona ishlab chiqariladi, bu esa ularga talab qanchalik yuqori ekanini ifodalaydi.
Dunyo boʻylab transport sohasining yashil koʻrinishga oʻtishini tezlashtirish maqsadida BYD Auto sof elektr va plaginli gibrid transport vositalarini ishlab chiqarishga eʼtibor qaratgan.
Butun dunyo boʻylab kompaniyada jami 700 ming nafardan ortiq xodimlar faoliyat yuritadi. Bundan tashqari BYD Xitoyda eng koʻp ish oʻrni yaratgan yaʼni eng koʻp xodim ishlaydigan kompaniya hisoblanadi.
BYD Central Asia ning bosh idorasi Oʻzbekistonda joylashgan boʻlib, BYD Group ning Markaziy Osiyodagi birinchi filiali hisoblanadi. Mazkur filialning direktor oʻrinbosari Ivan Saoning Renessans TV dagi “Sherzodxon Qudratxoʻja bilan” loyihasiga bergan intervyusida aytishicha, kompaniyadagi xodimlarning 90 mingdan ortigʻi muhandis yoki texnik yoʻnalishidagi mutaxassislardir. Bu esa BYD ning ilmiy tadqiqotlar boʻyicha ham kuchli imkoniyatlarga ega ekanini bildiradi.
Shuning uchun BYD nafaqat transport vositalarini, balki batareyalar, elektronika, shuningdek, temiryoʻl transporti va energiya saqlash tizimlarini ham ishlab chiqaradi. Ushbu sohada kompaniya dunyoning eng kuchli 500 kompaniyasi reytingida 143-oʻrinni egallaydi. Shu bilan birga soʻnggi yillarda BYD elektr transport vositalarini sotish va ishlab chiqarish boʻyicha dunyoda birinchi oʻrinni egallab kelmoqda.
Xususan, yaqinda taqdim etilgan BYD e2 elektromobili nafaqat BYD modellari orasida, balki shu modelga oʻxshash boshqa elektromobillar oʻrtasida ham qulaylik, energiya sarfi va narx borasida raqobatlasha oladi. Kompaniyaning hisob-kitoblarida keltirilishicha, ushbu modelning har 100 km masofaga elektr sarfi 13-15 kilovattga teng. Bu esa benzin yoki gaz orqali harakatlanadigan avtomobillarga nisbatan mablagʻni tejashga yordam beradi. Hisob-kitoblarda BYD e2 modeli orqali 10 million soʻmgacha mablagʻni tejab qolish mumkinligi maʼlum qilingan.
Aslida 1995-yilda batareya ishlab chiqaruvchi kompaniya sifatida ish boshlagan BYD bugungi kunga kelib Tesla ning Germaniyadagi korxonasiga ham batareyalarni yetkazib beradi. Yaʼni Berlinda ishlab chiqariladigan Tesla elektromobillarida ham BYD batareyalaridan foydalaniladi. Bu esa BYD avtomobillari va batareyalarining jahondagi eng yuqori sifatli, ishonchli va xavfsiz ekanini ham bildiradi.
