Britaniya Yutong avtobuslari masofadan o‘chirilishi ehtimolini tekshiradi

Tekshiruvga Norvegiya tomonidan olib borilgan tadqiqot sabab bo‘ldi. Unda Yutong kompaniyasi o‘z avtobuslarini masofadan turib o‘chirishi yoki ishdan chiqarishi mumkinligi aniqlandi. Hozirgi vaqtda Buyuk Britaniyada 700 ga yaqin Yutong avtobuslari bor, ular asosan Nottingem, Janubiy Uels va Glazgoda harakatlanadi.

Buyuk Britaniya Transport vazirligi Kiberxavfsizlik milliy markazi bilan hamkorlikda tekshiruv o‘tkazilishini tasdiqladi. Yutong kompaniyasi esa masofaviy ulanishdan faqat texnik xizmat ko‘rsatish va transport vositalarining ishlashini optimallashtirish uchun foydalanishini ma’lum qilgan. Norvegiya tadqiqotidan keyin Daniya ham xuddi shunday tekshiruvni boshladi.

“Yutong kompaniyasi har bir avtobusning dasturiy ta’minoti, texnik diagnostikasi va akkumulyator tizimlariga masofadan kirish imkoniga ega”, deyiladi Norvegiya tekshiruvida.

Muammoni bartaraf etish uchun avtobusdagi modemlardan SIM kartalarni olib tashlab, internet aloqasini uzish tavsiya etilgandi.

O‘zbekistonda-chi?

2023-yilda O‘zbekiston Yutong va King Long kompaniyalaridan jami mingta avtobus va elektrobusni 210 million dollarga xarid qilgan. 2025-yilda jami 200 dona elektrobus va ular uchun quvvatlash uskunalarini xarid qilish rejalashtirilgan. 2026-yil yakunigacha Toshkent shahriga 1200 ta elektrobus va turli sig‘imdagi avtobuslar olib kelinishi ma’lum qilingan.

Yevropada Xitoy avtobuslari bilan bog‘liq holat O‘zbekistonga olib kelingan avtobuslarda ham kuzatilishi mumkinmi?

Mazkur masala yuzasidan Transport vazirligi matbuot xizmati rahbari Navro‘z Ashurmatov “Daryo”ga izoh berdi.

Aniq fikr aytish uchun sinov o‘tkazib ko‘rish kerak bo‘ladi. Odatda Xitoy ishlab chiqaruvchilari avtobuslarning ehtiyot qismlarini yoki boshqa texnik jihatlarini yangilash nuqtayi nazaridan masofadan avtobusni kuzatib, bu haqda, ya’ni foydalanuvchini ogohlantirib turadi, dedi Navro‘z Ashurmatov.

“Toshshahartransxizmat” matbuot kotibi Muslima Obidovaning ta’kidlashicha, Niderlandiyada sinovdan o‘tkazilgan Yutong modeli bilan O‘zbekistondagi model boshqa-boshqa.

“Daryo” muxbirining avtobuslar O‘zbekistonga olib kelinishidan avval xavfsizlik bo‘yicha tekshiruvdan o‘tadimi, degan savoliga Muslima Obidova og‘zaki murojaatni qabul qilmasligini, yozma xat orqali so‘rov yuborish kerakligini ma’lum qildi.