Amerikalik tadbirkor va milliarder Ilon Mask AQSH shiddat bilan bankrot boʻlayotganini aytib, davlat qarzi boʻyicha foiz toʻlovlari mamlakat mudofaa byudjetidan oshib ketganini taʼkidladi.
“Agar AQSHning sobiq prezidenti Donald Tramp prezidentlik saylovlarida gʻalaba qozonsa, biz hukumatning oʻziga xos juda kam uchraydigan deregulyatsiyasi (jamoat munosabatlarining maʼlum bir sohasida davlat tomonidan tartibga solishni bekor qilish yoki qisqartirish)ni amalga oshirish imkoniyatiga ega boʻlamiz. Chunki AQSH shiddat bilan bankrot boʻlmoqda. Mudofaa vazirligi byudjeti yiliga bir trillion dollarni tashkil etadi va milliy qarz boʻyicha foiz toʻlovlari mudofaa byudjetidan oshib ketdi”, dedi Mask.
Oʻz navbatida, Respublikachilar partiyasidan prezidentlikka nomzod Donald Tramp oʻtgan hafta prezidentlik saylovlarida gʻalaba qozonsa, hukumatni isloh qilish boʻyicha komissiya tuzib, uning samaradorligini oshirishga vaʼda berib, unga Mask rahbarlik qilishini qoʻshimcha qilgandi.
AQSHda prezidentlik saylovlari 5-noyabr kuni boʻlib oʻtadi. Sobiq prezident Donald Tramp Respublikachilar partiyasidan davlat rahbari lavozimiga nomzod qilib koʻrsatilgan. Unga demokrat nomzod — vitse-prezident Kamala Xarris raqiblik qiladi.
