“Ostona arena”da boʻlib oʻtgan tadbirda Qozogʻiston prezidenti Qosim-Joʻmart Toʻqayev, Qirgʻiziston Respublikasi prezidenti Sadir Japarov, Turkman xalqining milliy yetakchisi, Turkmaniston Xalq maslahati raisi Gurbanguli Berdimuhamedov, Tatariston raisi Rustam Minnixanov va boshqa xorijiy mehmonlar ham qatnashdi.
Musobaqada dunyoning 90 ga yaqin davlatidan 2 mingdan ortiq sportchi, jumladan, Oʻzbekiston vakillari ishtirok etmoqda. Hamyurtlarimiz kurash, alish, arqon tortish, kamondan oʻq otish, poyga, pahlavonlar bellashuvi kabi yoʻnalishlarda kuch sinashadi.
Ishtirokchilarga koʻchmanchi xalqlarning boy madaniyati va tarixi, anʼana va urf-odatlariga bagʻishlangan teatrlashtirilgan tomoshasi namoyish etildi.
Marosimdan soʻng davlat rahbari Toshkentga joʻnab ketdi. Ostona xalqaro aeroportida oliy martabali mehmonni Qozogʻistonning bosh vaziri Oljas Bektenov kuzatib qoʻydi.
Eslatib oʻtamiz, kecha Shavkat Mirziyoyev Qozogʻistonga yetib borgani va uni bosh vazir kutib olgani haqida
xabar berilgandi.
Shuningdek, 2026-yilda Xalqaro koʻchmanchilar oʻyinlarining yurtimizda oʻtkazilishi haqida ham
maʼlum qilingandi.
