Saida Mirziyoyeva Samarqandda yangitdan ochiladigan Bolalar kutubxonasi konsepsiyasi bilan tanishdi

Kutubxona 1911-yilda barpo etilgan tarixiy binoda joylashadi. Toshkentdagi kutubxona singari ushbu inshoot ham madaniy o‘ziga xosligi va davr ruhi saqlangan holda, ehtiyotkorlik bilan restavratsiya qilinadi.

Ushbu kutubxona bolalar, o‘smirlar, ularning ota-onalari va ustozlari uchun chinakam ijodiy maskanga aylanishi qayd etilgan. Loyihada inklyuzivlikka alohida e’tibor qaratilgan: ko‘zi ojiz va zaif ko‘ruvchi bolalar uchun audiofond tashkil etish rejalashtirilgan.

Kutubxona fondi o‘zbek, ingliz va rus tillarida jami 120 000 jild kitobni o‘z ichiga oladi.

“Bu Samarqand ahli uchun ajoyib, ma’naviy boylikka to‘la jozibador maskan bo‘lishi shubhasiz. Loyihaga muvaffaqiyat tilab qolaman”, deb yozdi Saida Mirziyoyeva.

2023-yilda Saida Mirziyoyeva yangilangan Respublika bolalar kutubxonasini borib ko‘rgandi. Kutubxona o‘zbek va jahon bolalar adabiyotiga oid 180 ming kitob fondiga ega. Zamonaviy axborot texnologiyalaridan foydalanilayotgani xodimlar ishini yengillashtirib, kitobxon bolalarga qo‘shimcha qulaylik yaratgan. Jumladan, tashrif buyuruvchilar maxsus ID-karta oladi. U orqali kitobxonlarni ro‘yxatga olish, kitob olish va topshirish jarayonlari elektron tarzda tashkil etiladi.