“Reuters” nashri koʻra, Nyu-York iqtisodiy klubida nutq soʻzlagan sobiq prezident mahalliy ishlab chiqaruvchi kompaniyalar uchun korporativ soliq stavkalarini kamaytirishga, federal hududlarda qurilish kompaniyalari uchun ragʻbatlantiriladigan past soliq zonalarini tashkil etishga va suveren boylik fondini boshlashga vaʼda berdi.
“Men hukumat faoliyati boʻyicha komissiya tuzaman, u ham moliya, ham butun hukumat faoliyatini koʻrib chiqadi va bizga kerak boʻlgan keng qamrovli islohotlar boʻyicha tavsiyalar beradi”, degan Tramp.
Shuningdek, u oʻzini qoʻllab-quvvatlagan Mask boʻlajak komissiyani boshqarishga rozi boʻlganini ham maʼlum qildi. Unga koʻra, Tramp noyabr oyidagi saylovda gʻalaba qozonsa, hukumat dasturlari auditini oʻtkazish uchun rahbariyatiga Mask ham kirishi mumkin boʻlgan maxsus komissiya tuzish imkoniyatini koʻrib chiqmoqda.
Oʻz oʻrnida, avvalroq Tesla rahbari ham sobiq prezident bilan komissiya haqida suhbatlar oʻtkazgani va unda xizmat qilishdan manfaatdor boʻlishini taʼkidlagan edi. Xususan, Mask Tramp nomzodini qoʻllab-quvvatlab, uning saylovoldi kampaniyasini moliyaviy taʼminlashga vaʼda bergan va AQSH hukumatida oʻrin egallashga tayyor ekanini maʼlum qilgan. Gʻarb OAVlari ham Tramp saylovda gʻalaba qozonsa, tadbirkorga oʻz maʼmuriyatidan lavozim taklif qilishini yozmoqda.
Maʼlumot uchun, AQSHda prezidentlik saylovlari 5-noyabr kuni boʻlib oʻtadi. Sobiq prezident Donald Tramp Respublikachilar partiyasidan davlat rahbari lavozimiga nomzod qilib koʻrsatilgan. Demokratlardan esa vitse-prezident Kamola Harris mamlakat rahbarligi uchun kurashadi.
