Oliy Rada Ukraina Tashqi ishlar vazirining sobiq birinchi oʻrinbosari Andrey Sibiga yangi Tashqi ishlar vaziri etib tayinlanishini maʼqulladi. Bu haqda Ukraina parlamenti deputati Yaroslav Jeleznyak maʼlum qildi.
Qayd etilishicha, bu qarorni 258 deputat qoʻllab-quvvatlagan. Ilgari Ukraina Prezidenti devonida ishlagan Sibiga nomzodi avvalroq davlat rahbari Vladimir Zelenskiy tomonidan taqdim etilgan edi.
Maʼlumot uchun, Sibiga 1975-yilda Ukraina gʻarbidagi Ternopil viloyati Zborov shahrida tugʻilgan. Lvov universitetining xalqaro munosabatlar fakultetini tamomlagan, shuningdek, huquqshunoslik malakasiga ega. 1997-yilda u Ukraina Tashqi ishlar vazirligida oʻz faoliyatini boshlagan va ham markaziy apparatda, ham xorijiy vakolatxonalarda ishlagan. 2012-2016-yillarda Tashqi ishlar vazirligi Konsullik xizmati departamentini boshqargan, 2016-2021-yillarda Ukrainaning Turkiyadagi elchisi boʻlgan. 2021-2024-yillarda Ukraina Prezidenti devonining oʻrinbosari sifatida faoliyat olib borgan. 2024-yildan Tashqi ishlar vazirining birinchi oʻrinbosari lavozimida ishlab kelayotgan edi.
Eslatib oʻtamiz, avvalroq sobiq Ukraina TIV rahbari Kuleba isteʼfoga chiqqani xabar qilingan edi.
