Sobiq “Arsenal” futbolchisi yo‘qolgan iti uchun 20 ming dollar mukofot e’lon qildi

Bu haqda futbolchi o‘zining Instagram sahifasida ma’lum qildi. Uning sevimli iti — Xeylo (beagle zotli) 9-oktyabr kuni bedarak yo‘qolgan.

Xabar berilishicha, Xeylo oy boshida Meksikaning San-Migel-de-Alende shahrida, Hipsterrier hayvonlar boshpanasi yaqinida g‘oyib bo‘lgan. Shundan buyon itning izidan hech qanday darak yo‘q. Remsi bu voqeadan so‘ng ijtimoiy tarmoqlarda murojaat bilan chiqdi:

“Kameralar ishlamagan, guvohlar ham, izlar ham yo‘q. Biz shunchaki Xeylo bilan xayrlashmoqchimiz, ammo u tirikmi yoki yo‘qmi — bilmaymiz”, deb yozdi u.

Remsi Xeyloning qora-oq suratini “Seni yana bir bor bag‘rimga bosish uchun nima berishni ham bilmayman, Xeylo” degan so‘zlar bilan joylashtirdi.

Futbolchining rafiqasi Kolin ham itni izlash ishlarida faol ishtirok etmoqda:

“Men Xeylo shunchaki g‘oyib bo‘lganiga ishonmayman. Uni kimdir olib ketgan bo‘lishi mumkin. Iltimos, suratni tarqating. U tirik yoki yo‘qligidan qat’i nazar, topishimiz kerak. Mukofot bor. Agar ko‘rsangiz, iltimos, darhol bizga xabar bering”.

Xeylo Remsi oilasining a’zosi sifatida 10 yildan ortiq vaqt davomida ular bilan birga yashab kelgan. Ular bilan Angliya, Italiya va endi Meksikada hamrohlik qilgan. Remsining uch o‘g‘li — Sonni, Tomas va Teddi — itning yo‘qolishidan qattiq xafa ekanligi aytilmoqda.

Remsi hozir ham ijtimoiy tarmoqlarda Xeylo haqidagi surat va videolarni ulashib, ko‘ngillilar, hayvonlar boshpanalari hamda shaxsiy tergovchilar bilan birgalikda qidiruv ishlarini davom ettirmoqda.