Hindiston Rossiya bilan bitimlarni to‘xtatdi

AQSHning Rossiyaga qarshi sanksiyalari kiritilgandan so‘ng, Hindistonning yirik neft qayta ishlash zavodlari Urals neftini sotib olishni to‘xtatib, kutish pozitsiyasini egalladi. Bu haqda Bloomberg xabar bermoqda.

Gap Indian Oil Corp., Bharat Petroleum Corp. va Hindustan Petroleum Corp. kompaniyalari haqida bormoqda. Nashrning ma’lumotlariga ko‘ra, neft qayta ishlash zavodlari rahbariyati hukumatning ko‘rsatmalarini kutmoqda va mumkin bo‘lgan alternativalarni baholamoqda.

Agentlik ta’kidlashicha, sanksiyalar kiritilishidan avval Rossiyaning ESPO nefti narxi etalon bo‘lgan Brent’dan bir barrel uchun bir dollarga qimmatroq edi. «Hozirda esa Rossiya Uzoq Sharqidan yetkazib beriladigan bu markaning spot savdolari ICE Brent narxidan 50 foiz chegirma bilan taklif qilinmoqda», - deb xabar berdi treyderlar.

Xitoy neft qayta ishlash kompaniyalari G‘arb sanksiyalari tufayli xaridlarning bir qismini bekor qilganidan so‘ng Rossiya neftining narxi tushib ketdi.

22 oktyabr kuni AQSH Moliya vazirligi «Rosneft», «Lukoyl» va ularning qo‘shma korxonalariga qarshi cheklovlar joriy etganini ma’lum qildi. Vashington bunga Rossiyaning «tinchlik jarayonidagi jiddiy qiziqishsizligi»ni sabab qilib ko‘rsatdi va ittifoqdosh davlatlarni ham sanksiyalarga qo‘shilishga chaqirdi.

Avvalroq prezident Donald Tramp Hindiston uchun bojxona to‘lovlarini 50 foizgacha oshirgan edi. U «Hindiston hukumati to‘g‘ridan-to‘g‘ri yoki bilvosita Rossiyadan neft import qilmoqda» deb aytgan edi.

Oktyabr oyida u bosh vazir Narendra Modi Rossiya neftini sotib olishdan voz kechishga va’da berganini ma’lum qilgan edi.