18.10.2024 18:27
Mazkur debatda 5 ta siyosiy partiya vakillari fuqarolardan kelib tushgan va o'zaro bir-birlariga berilgan savollarga javob berishdi.
— Hozirgi kunda xususiy oliygohlar soni ko‘payib bormoqda. Bu yaxshi. Lekin xususiy universitetlarda talabalar asosan to‘lov shartnomasi asosida o‘qiydi. Bunga esa har kimning ham qurbi yetmaydi. Daromadi past bo‘lgan yoki bir nechta farzandini o‘qitayotgan oilalarning farzandlari uchun bu borada biron imtiyoz yoki yengilliklar haqida ham takliflaringiz bormi?
O‘zbekiston Xalq demokratik partiyasidan vakil - Feruza Madrahimova:
— Oliy taʼlim olish muddati kamida uch yilni tashkil qiladi. Yoshlar taʼlim dargohini tanlayotganda albatta, to‘lov-kontrakt miqdorini hisobga oladi. Oilaviy sharoitiga qarab, 3-4 yillik to‘lov summasini o‘ylab keyin o‘qishga qaror qiladi.
Agar oliy taʼlim dargohi to‘lovni har yili oshirib borsa, bu fuqarolarning taʼlim olish huquqiga salbiy taʼsir ko‘rsatmasligiga yoki ularning ijtimoiy himoyasini kuchsizlantirmasligiga kim kafolat beradi?
Partiyamizning ushbu tashabbusi kontrakt barqarorligini taʼminlash, oliy taʼlim muassasalari xarajatlarini strategik rejalashtirish, mablag‘larni maqsadli yo‘naltirish, shuningdek oilaviy byudjetlarni ham rejalashtirish uchun yordam beradi.
— Bugungi kunda hayotimizga zamonaviy ilm-fan texnologiyalari, xususan, sunʼiy intellekt shiddat bilan kirib kelmoqda. Agar, buni yoshlarimizga o‘z vaqtida o‘qitib, o‘rgatmasak, zamondan ortda qolishimiz mumkin. Dasturingizda shunday dolzarb masalalar ham qamrab olinganmi?
“Adolat” sotsial-demokratik partiyasidan vakil - Oydin Abdullayeva:
— Sunʼiy intellekt asosida “Aqlli maktab” dasturini taʼlim tizimiga joriy etishni ilgari suryapmiz. Bu dastur orqali o‘quvchilarimiz sunʼiy intellekt, robototexnika va maʼlumotlarni tahlil qilish kabi ilg‘or texnologiyalarni o‘rganish imkoniyatiga ega bo‘ladi.
Bu nafaqat ularning bilimlarini kengaytiradi, balki kelajakda ushbu texnologiyalarni yaratish va ulardan samarali foydalanish qobiliyatini ham rivojlantiradi.
— Bugun butun dunyoda oziq-ovqat narxi oshishi kuzatilmoqda. Mamlakatimiz ham bundan mustasno emas. Partiyangizning narx-navo o‘sishini oldini olish bo‘yicha takliflari bormi?
O‘zbekiston Liberal-demokratik partiyasidan vakil - Umid Yoqubxo‘jayev:
— Birinchidan, hosildorlikni oshirish orqali ichki bozorni sifatli va arzon mahsulotlar bilan taʼminlash
Ikkinchidan, qishloq xo‘jaligi mahsulotlarini saqlash, qayta ishlash va tarqatish infratuzilmasini kuchaytirmoqchimiz ishni nazarda tutgan. Jumladan, yetishtirilgan mahsulotlarni saqlash uchun 2,5 million tonna quvvatga ega bo‘lgan 100 ta agrologistika markazini tashkil qilamiz.
Mazkur infratuzilmalarning rivojlanishi oziq-ovqat mahsulotlarini barqaror saqlash va bozorga yil davomida uzluksiz yetkazib berish orqali narx-navolar barqarorligini taʼminlaydi.
— Ayrim hollarda maktab o‘quvchilari bilan bog‘liq, o‘qituvchi va o‘quvchilar o‘rtasidagi turli nizoli vaziyatlar yoki ota-onalarning o‘qituvchilar bilan kelishmovchiliklari muhokama markaziga aylanib qolmoqda. Partiya yuqoridagi kabi muammoli vaziyatlar bo‘yicha qandaydir yechim yoki taklifga egami?
“Milliy tiklanish” demokratik partiyasidan vakil - Shahnoza Joldasova:
— 2025-2029 yillarga mo‘ljallangan Saylovoldi dasturida Taʼlim muhiti xavfsizligini taʼminlash, javobgarlik choralarini kuchaytirish vazifasini ilgari surmoqda.
Partiyamiz, maktabning jamiyatdagi o‘rnini oshirish, taʼlim beruvchilar malakasi darajasini ko‘tarish, maktab rahbariyati va o‘qituvchilar, o‘qituvchi va o‘quvchilarning o‘zaro samimiy va hurmatga asoslangan munosabatlariga erishish lozim deb hisoblaydi.
Bundan tashqari, taʼlim muhiti xavfsizligiga taʼsir etishi mumkin bo‘lgan barcha faktorlar eʼtibordan chetda qolib ketmasligi maqsadga muvofiq hisoblanadi. Partiya o‘z tashabbusi bilan bu munosabatlarni buzishga bo‘lgan har qanday urinish uchun jazo choralarini kuchaytirishni tashabbus qiladi.
— Bugun poytaxtimizda atmosfera havosini muhofazasi dolzarb muammoga aylangan. Ekopartiya bu borada qanday takliflarga ega?
O‘zbekiston Ekologik partiyasidan vakil - Navro‘zbek Yusupov:
— Atmosferaga zararli taʼsirni kamaytirish maqsadida energetika, transport, sanoat va qurilish korxonalaridan chiqarilayotgan zararli gazlar miqdorini 2 barobarga kamaytirish, meʼyordan ortiq ifloslantirganlarga kompensatsiya to‘lovlarini 10 barobargacha oshirish taklifini ilgari surganmiz.
Issiqxona gazlari emissiyasini 65 foizga qisqartirish, uglerod neytralligi va nol emissiyaga erishish, atmosfera havosining ifloslanishiga sabab bo‘luvchi imtiyozlarni bekor qilish kabi tashabbuslarimiz bor.
Toshkent shahri va viloyat markazlaridagi avtobuslarni elektrobuslarga almashtirishni ham dasturimizda vazifa qilib belgilaganmiz.
