O‘quvchilarda xalqimizning ma’naviy-ma’rifiy qadriyatlariga, madaniyati va urf-odatlariga chuqur hurmat, halollik, vatanparvarlik, sadoqat, fidokorlik singari insoniy fazilatlarni shakllantirish hamda tabiiy va aniq fanlar, xorijiy tillar va zamonaviy axborot texnologiyalari bo‘yicha mustahkam bilimlarni shakllantirish, shuningdek, ularga harbiy ishdagi boshlang‘ich bilimlarni singdirish litseyning asosiy faoliyat yo‘nalishi hisoblanadi.
O‘quv xonalari eng so‘nggi rusumdagi multimedia va kommunikatsiya vositalari bilan jihozlangan.
Litsey axborot-resurs markazida 7 mingdan ortiq o‘quv va badiiy kitoblar, 11 mingdan ortiq elektron adabiyotlar bor.
Harbiy litsey axborot-resurs markazi viloyat oliy ta’lim muassasalari hamda Alisher Navoiy nomidagi O‘zbekiston Milliy kutubxonasi tarmog‘iga ulangan.
Uchrashuvda Robaxon Maxmudova litsey o‘qituvchilari, bo‘lajak Vatan himoyachilariga "Adolat" SDP faoliyati, joriy saylovlarda muvaffaqiyatli ishtirok etish uchun olib borilayotgan targ‘ibot ishlari xususida ma’lumot berdi.
Shuningdek, partiyaning 2025-2029-yillarga mo‘ljallangan Saylovoldi dasturida "OTMlarda harbiy kafedralar tashkil etish" taklifi aks etganini qayd etib o‘tdi.
— Mazkur taklifimiz umumiy mudofaa tizimini kuchaytirish va yoshlarni vatanparvarlik ruhida tarbiyalashga qaratilgan keng qamrovli tashabbusdir. Xususiy OTMlar ham bu jarayonda ishtirok etishi muhim, chunki har qanday kasb vakili – u pedagog bo‘ladimi, arxitektor yoki san’at sohasi mutaxassisi bo‘ladimi – mamlakat xavfsizligi masalasida bilim va ko‘nikmalarga ega bo‘lishi kerak va shart,-dedi Siyosiy Kengash raisi Robaxon Maxmudova.