Ekopartiya: Tezyurar poyezdlarni ko‘paytirish kerak
16.10.2024 13:02
Joriy yilgi saylovlar oldidan O‘zbekiston Ekologik partiyasi tomonidan an’anaviy yo‘lovchi tashish poyezdlarini zamonaviy tezyurar poyezdlarga almashtirish va yo‘l haqi narxlarini maqbullashtirish tashabbusi ilgari surilmoqda.
Xorijiy tajribada ham temir yo‘l transportlari boshqa transport vositalariga nisbatan qulay, xavfsiz va arzonligi bilan ajralib turishi hech kimga yangilik emas.
Partiya tashabbusiga ko‘ra, temir yo‘l sohasiga xorijiy investitsiyalarni jalb qilish, temir yo‘llar jozibadorligini oshirish maqsadida yo‘lovchilarga turli imtiyozlar berish, temir yo‘llarga yangi tezyurar lokomotivlar va zamonaviy qulayliklarga ega bo‘lgan yo‘lovchi vagonlarni xarid qilish, temir yo‘l xizmatlarning umumiy qamrovini kengaytirish hamda qo‘shni mamlakatlarning temir yo‘l tarmoqlari bilan bog‘lamalar hosil qilish singari ishlarni amalga oshirish maqsadga muvofiq bo‘ladi.
Partiyaning ilgari surilayotgan tashabbusi mamlakatimizning temir yo‘l transporti korxonalari va tashkilotlarining xizmatlar bozorini kengaytirish va tarif siyosatini muqobillashtirish orqali sayyohlik tashishlarni kengaytirish va sayyohlik-ekskursiya poyezdlarini rivojlantirishga xizmat qiladi.