Qalbaki spirtli ichimliklar sabab 48 kishi vafot etdi

Soxta ichimliklar ishlab chiqarish bilan shug‘ullangan gumonlanuvchilar qo‘lga olindi, biroq Eron bozorida o‘ta xavfli ichimliklar hamon mavjud, deb yozadi Hamshahri.

Nashr ma’lumotlariga ko‘ra, respublikaning to‘rtta viloyatida metil spirtidan tayyorlangan alkogolli mahsulotlarni iste’mol qilish oqibatida vafot etganlar va ko‘rish qobiliyatini yo‘qotganlar soni ortib bormoqda.

Hozirgacha 48 kishi vafot etgan. Ularning yarmidan ko‘pi Mozondaron viloyatida, qolganlari Gilon, Zanjon va Hamadon viloyatlarida yashagan. To‘rt viloyatda yuzlab odamlar zaharlanib, kasalxonaga yotqizilgan, ularning ba’zilari ko‘rish qobiliyatini yo‘qotgan.

Halok bo‘lganlar va jarohatlanganlar qanday ichimlik ichgani va uni qaysi kompaniya tayyorlagani haqida ma’lumot yo‘q. Qalbaki mahsulotlarni ishlab chiqarish va tarqatish bilan shug‘ullangan gumondorlar hibsga olingan bo‘lsa-da, hukumat xavfli mahsulotlarni bozordan tizimli ravishda olib tashlashga qodir emas.