8-oktyabr kuni milliarder Alisher Usmonov Germaniyaning ARD telekanali jurnalisti Xans-Yoaxim (Xayo) Zeppeltni jinoiy javobgarlikka tortishni talab qilib, Kyoln prokuraturasiga ariza topshirdi. Bu haqda Bild nashri xabar berdi.
Ma’lum qilinishicha, milliarderning noroziligiga 4-avgust kuni ARD telekanalida Parijdagi Olimpiada o‘yinlarida qilichbozlik bo‘yicha berilgan reportaj sabab bo‘lgan. Unda Zeppelt «kerakli» sportchilarning g‘alabalarini ta’minlash uchun Xalqaro qilichbozlik federatsiyasi (FIE)ning «hakamlarini sotib olish tizimi» yaratilganini bildirgan.
Zeppeltning surishtiruvi iste’fodagi FIE hakamining so‘zlari va Olimpiadaning 1/8 finalida gurjistonlik qilichboz Sandro Bazadzening misrlik Muhammad Amerga yutqazganiga asoslangan edi. Shundan so‘ng sportchi hakamlik adolatsiz bo‘lganini aytdi. Keyinchalik uning otasi, Gurjiston qilichbozlik federatsiyasi prezidenti Merab Bazadze buni Sandroning ruhiy tushkunligi bilan izohladi va kechirim so‘radi. Zeppelt bilan suhbatlashgan sudya FIE unga 2023-yilgi saralashdan o‘ta olmagani va hakamlar hay’atidan chetlashtirilganini ma’lum qilganini aytdi.
Shtaynxyofel Zeppeltning reportajlari «asosiy jurnalistika standartlarini buzgani» va bu «jurnalistika emas, balki sharmandalik» ekanini ma’lum qildi. Oktyabr oyida Hamburg sudi Usmonovning da’vosiga ko‘ra, milliarderga qarshi ayblovlar bo‘lgan ARD reportajini tarqatishni taqiqlab, material shubhaga asoslangan va shaxsiy daxlsizlik huquqini buzadi degan qarorga keldi. Shundan so‘ng nemis telekanali reportajni o‘chirib tashladi.
