Siyosiy partiyalarimiz, nomzodlarimiz o‘z saylovoldi dasturining mazmun-mohiyati bo‘yicha saylovchilarimizning e’tiboru diqqatini tortib bormoqda. Bo‘lib o‘tgan uchinchi debatni diqqat bilan kuzatar ekanmiz, unda oldingilaridan tubdan farq qiladigan jihatlari yaqqol ko‘zga tashlandi. Yangi qiyofalar, yangicha shukuh, serqirra shijoat, bahs munozara to‘laligicha hukm surdi.
Bularni biz quyidagilarda kuzatishimiz mumkin bo‘ladi:
Birinchidan, teledebatlar partiyalarning hayotiy g‘oyalari, maqsadlari, vazifalari muhokamasiga qaratildi. Ya’ni, muhim bo‘lgan partiya tashabbuslarining tub maqsadlari, mazmun-mohiyatiga qaratildi.
Ikkinchidan, barcha partiyalar o‘zlarining saylovoldi dasturida tadbirkorlikka e’tibor qaratar ekan, O‘zLidep partiyasi kripto-aktivlar bozorini rivojlantirish va sohadagi qonunchilikni bosqichma-bosqich liberallashtirish; Milliy tiklanish partiyasi bolalar ijodkorlarining kitoblarini ijtimoiy buyurtmalar asosida chop ettirishni ko‘paytirish; Ekologik partiya tomonidan xonadonlarning o‘zida, savdo shaxobchalari, korxona va tashkilotlarda chiqindilarni qabul qilib olish tizimini joriy etish; XDP tomonidan, qo‘lida hunari bor, uy sharoitida hunarmandchilik bilan shug‘ullanish imkoniga ega bo‘lgan imkoniyati cheklangan fuqarolarni qo‘llab quvvatlash tizimini takomillashtirish; Adolat partiyasi tomonidan, aholining ehtiyojmand qatlamlari toifasiga kirgan shaxslarni ishga qabul qilganlik uchun soliq imtiyozlari belgilash kabi jamiyatimiz uchun, xalqimiz hayot farovonligini yaxshilash uchun takliflar bildirib o‘tildi;
Uchinchidan, teledebatda siyosiy partiya Spikerlari bir - birlariga boshqa partiyalar dasturlaridan kelib chiqib, muammoli, yechimi topishi kerak bo‘lgan masalalari bo‘yicha savollar berishdi. Nazarimizda, Spikerlar o‘ziga yuklatilgan vazifani, ya’ni javoblarini asoslantirilgan tarzda berishga harakat qilishdi. Ya’nikim, Spikerlar bu vazifani hozirjavoblik, tahliliy va aniq ma’lumotlar tayangan holda javob berishni odilona bajardi desak ham mantiqan to‘g‘ri bo‘lardi.
Shu bilan birga, diqqatimni tortgan bir jihat shu bo‘ldiki, partiya Spikerlari savol berish bilan birga, qaysidir ma’noda berilgan javoblarga ham o‘z e’tirozlarini bildirishdi. Bu albatta, keyingi debatlarda ishtirok etuvchi partiya vakillariga katta mas’uliyat yuklaydi, qattiq tayyorgarlikni talab etadi.
To‘rtinchidan, qolaversa, har bir siyosiy partiya Spikerlari o‘zining muhim chorlov murojaati bilan saylovchilarga yuzlandi. Albatta, chorlov nomigagina bo‘lmaydi. Ya’ni, chorlovda muhim konseptual jihatlar, muhim siyosiy chizgilar, partiya orqali erishish mumkin bo‘lgan chorlovlar xalqni, saylovchini o‘ziga ergashtiradigan tarzda o‘ta ishonchli, aniq va haqiqatga yaqin bo‘lishi lozim. Ta’kidlash lozimki partiya Spikerlari o‘ta darajada ishonchli bo‘lmasada, ammo yetarli tarzda qisqa vaqt mobaynida saylovchilar e’tiboriga tushishga harakat qilishdi va buni uddalashdi desak, ham xato qilmagan bo‘lamiz.
Nazarimizda, mazkur debatlar orqali saylovchilar siyosiy partiyalar, nomzodlarni yanada yaqindan bilib olish imkoniyatini kengaytirmoqda, partiyalarning berayotgan takliflari haqiqatda ham asosli masalayu muammolarga qaratilganligi, ularning xalq manfaatlari yo‘lida xizmat qilishda, tegishli masalalarni hal qilishda yetarli imkoniyati borligiga saylovchilarimiz ishonchi ortib bormoqda. Eng muhimi, jamoatchilik nazoratining yangi qiyofasi o‘z aksini topib bormoqda. Shuni alohida qayd etish lozimki, partiya vakillari tomonidan o‘zining jiddiyligi va harakatga tayyorligini tasdiqlovchi aniq qarorlar va raqamlarni taqdim etgan teledebat siyosiy raqobat kuchayib borayotganini namoyish etdi.
Muxtasar qilib aytganda, bo‘lib o‘tgan teledebat haqiqiy bahs – munozara, fikrlar almashunuvi siyosiy maydoniga aylandi, bu orqali partiyalar keyingi bo‘lib o‘tadigan debatlar uchun o‘zlariga yangi vazifalar, yangi yo‘nalishlar olishdi. O‘ylaymizki, keyingi debatlar bundanda o‘ta faollik, qizg‘in bahslar og‘ushida bo‘lib o‘tadi.