Paxta terimiga chiqmaganlarga bola puli berilmasligini aytgan mahalla raisi 18 million so‘m jarimaga tortildi.
Davlat mehnat inspeksiyasi Qashqadaryo viloyatidagi mahalla raisining paxta terimiga chiqmaganlarga bola puli berilmasligi bo‘yicha saytimizda e’lon qilingan ovozli xabari yuzasidan o‘rganish o‘tkazganini ma’lum qildi.
Aniqlanishicha, Shahrisabz tumanidagi “Paxtakor” MFY raisi L.O‘roqov 2024-yil 9-oktyabr kuni Nushkent qishlog‘ining “Nushkent birlashaylik” telegram kanaliga ushbu ovozli xabarni yuborib, ishsiz fuqarolarni paxta yig‘im-terimiga chaqirgan, shundan so‘ng ular terimga kelgan.
Holat yuzasidan L.O‘roqovga nisbatan, Ma’muriy javobgarlik to‘g‘risidagi Kodeksning 51-moddasi 1-qismiga asosan bazaviy hisoblash miqdorining 50 baravari (18 750 000 so‘m) miqdorida jarima qo‘llanildi.
