Ekopartiya: "Ekologik xavfsizlikka erishish kerak"
10.10.2024 11:02
Bu haqida bugun Toshkent viloyatidagi saylovchilar bilan bo‘lib o‘tgan uchrashuvda partiya rahbari Abdushukur Xamzayev alohida ta’kidlab o‘tdi.
Uchrashuvda O‘zbekiston Ekologik partiyasi saylovoldi dasturining eng muhim tashabbuslari haqida so‘z yuritildi.
— Xalqimizning qulay atrof-muhitga ega bo‘lish huquqlarini ta’minlashda yashil maskanlarni, har bitta daraxtni himoyalash mexanizmlari ishlashi talab etiladi, — A.Xamzayev. — Ayni shu maqsadda saylovoldi dasturimizdan bu borada muhim tashabbus – barcha viloyat va tumanlarda yashil maydon hamda daraxtzorlarning «yashil» kadastrini ishlab chiqish taklifi o‘rin olgan. Ya’ni, yashil maydon hamda daraxtzorlarga egalik huquqini qonunchilik hujjatlarida aniq belgilash, respublikadagi davlat o‘rmon fondiga kirmaydigan daraxtlarni to‘liq raqamlashtirish yo‘li bilan xatlovdan o‘tkazish zarur.
Shuningdek, dasturdan yirik shaharlar atrofidagi chiqindi poligonlar bazasida xalqaro standartlarga mos elektr stansiyalar qurish, bioko‘mirlar ishlab chiqarish va chiqindilarning energiya potensialidan unumli foydalanish masalalariga oid muhim tashabbuslar o‘rin olgani ham alohida qayd etildi.