Yapon aktyori Oʻzbekistonning turizm elchisi boʻldi

Keysuke Minami 1985-yilda Tokio shahrida tugʻilgan. Yaponiyaning mashhur Vaseda universiteti bitiruvchisi. Bir qancha yapon kino va seriallarida bosh rollarni ijro etgan. Yaponiyaning eng mashhur sayyohlik koʻrsatuvi — “Asada! Namadesu tabi sarada”ning asosiy boshlovchilaridan biri sifatida faoliyat olib bormoqda. Shuningdek, u “Jahon tarixiy merosi” master sertifikatiga ega boʻlib, “Jahon merosi akademiyasi” (World Heritage Academy) lektori sifatida ishlaydi.

Oʻzbekiston Turizm qoʻmitasining qayd etishicha, yapon aktyori avvalroq Oʻzbekistonda boʻlgan va tashrif yakunlari boʻyicha Oʻzbekistonning turizm salohiyatiga bagʻishlangan 5 qismli koʻrsatuv tayyorlagan.

Keysuke Minami Yaponiyada Oʻzbekistonning turizm salohiyati va uning turizm brendini keng targʻib qilish, sayyohlik loyihalarini amalga oshirish, yetakchi OAVda mamlakat salohiyati haqida koʻrsatuvlar tayyorlash va maqolalarni chop etishga koʻmaklashadi.