Hindistonning Rajastan shtatida odamxo‘r qoplonga ov e'lon qilindi. U 12 kun ichida yetti kishini o‘ldirdi.
Mahalliy o‘rmon departamenti to‘rtta qoplonni tutdi. Ammo odamxo‘r deb atalayotgani ular orasida bo‘lmagan. Yirtqichdan qo‘rquv aholini tungi patrullarni tashkil etishga majbur qildi. O‘tkir qurollar va tayoqlar bilan qurollangan odamlar qishloq ko‘chalarini kezishmoqda. Boshqalari esa o‘rmonda baraban chalib uni qidirishmoqda.
Armiya esa endi qoplonni qidirishga qo‘shildi. Askarlarga hayvonni zararsizlantirish vazifasi yuklatilgan. Uni tuzoqqa ilintirib, uxlatib qo‘yish kerak. Biroq harakatlar besamar ketsa, o‘ldirish uchun otishga ruxsat ham mavjud. Qidiruv ishlariga jami 10 ta guruhda 90 nafardan ortiq kishi jalb etilgan. Qoplon qurbonlari orasida, xususan, 5 va 16 yoshli ikki qiz, 65 yoshli ayol va ruhoniy bor. Garchi chorva mollari ko‘p bo‘lsa ham u odamlarga hujum qilishni afzal ko‘rgan.
Mahalliy aholi yirtqich qo‘lga olinmaguncha xavfsiz joyda qolishga chaqirildi.
