Xususan, Xalq demokratik partiyasi vakiliga quyidagi savollar berildi.
— Anomal ob-havo sharoitida oddiy ishchilar va xizmatchilarning huquqlarini himoya qilish bo‘yicha qanday tashabbuslar bildirilmoqda?
Malika Qodirxonova, partiya vakili:
— Bizning saylovoldi dasturimizda havo harorati belgilangan darajadan issiq yoki sovuq bo‘lgan kunlarda, xodimlarga ishga 1 soat kechikib kelish va ishdan 1 soat erta ketish huquqini berish taklif etilmoqda. Mehnatga oid qonunlarimizda bu masalalar belgilab qo‘yilishi kerak. Shuningdek, bizning partiyamiz zararli yoki xavfli mehnat sharoitlarida, noqulay tabiiy-iqlim sharoitlarida ishlayotgan xodimlarning huquqlarini himoya qilish va ularga qo‘shimcha imtiyozlarni kafolatlash tarafdoridir. Mehnat inspeksiyalarini vakolatini kuchaytirishni ham taklif etamiz.
— Xalq demokratik partiyasi qaramog‘ida voyaga yetmagan bolalari bor yoki homilador ayollar uchun ham qandaydir takliflar berganmi?
— Yangilangan Konstitutsiyamizning 42-moddasiga binoan homiladorligi yoki bolasi borligi sababli ayollarni ishga qabul qilishni rad etish, ishdan bo‘shatish va ularning ish haqini kamaytirish taqiqlanadi.
Biz ayollarning bolasini uch yoshga to‘lguncha uni parvarishlash taʼtilida bo‘lgan davrini ham ish stajiga to‘liq qo‘shish, pensiyaga chiqishda ham hisobga olishni taklif etyapmiz.
Shuningdek, homilador va qaramog‘ida voyaga yetmagan bolalari bor ayollarga masofaviy ishlash imkoniyatlarini yaratish bo‘yicha qonunchilik tashabbuslarimizni bildirmoqchimiz.