Konstitutsiyani himoya qilish federal idorasi (BfV) rahbari oʻrinbosari Zinan Zelen Telegram platformasini hamkorlikka tayyor emaslikda aybladi. Zelen tegishli pozitsiyani 28-avgust, chorshanba kuni Berlinda bildirdi.
Uning soʻzlariga koʻra, turli doiralar Pavel Durov platformasida muloqot qiladi va idora “diqqat markazida” boʻladi. Shu bilan birga, terrorizm yoki oʻng ekstremizmga qarshi kurashish haqida gap ketganda, “boshqa platformalardagi kabi maʼlumotlar almashinuvi (Telegram tomonidan) yoʻq”, deb taʼkidlaydi Zelen.
“Biz Telegramʻga savollar ham beryapmiz” va “javoblar - cheklangan”, deya uning soʻzlarini keltiradi AFP. “Qonunan ruxsat etilgan” soʻrovlar doirasida axborotni juda tez va ishonchli taqdim etuvchi platformalar mavjud, biroq Telegram ulardan biri emas, deya qoʻshimcha qildi Zelen.
Nemis kompaniyalariga tahdidlar kuchaymoqda
Germaniya Ichki ishlar vazirligi razvedka xizmati boshligʻi oʻrinbosari, shuningdek, Germaniyada Rossiya Federatsiyasining Ukrainaga qarshi urushi boshlanganidan beri onlayn-diversiya, internetda razvedka kampaniyalari va raqamli kuzatuvlar koʻpayganini taʼkidladi - nafaqat harbiylar, balki siyosiy partiyalar va nemis kompaniyalari boʻyicha ham. BfV hamda Bitkom soha assotsiatsiyasi tomonidan taqdim etilgan yangi Wirtschaftsschutz 2024 hisoboti shuni koʻrsatadiki, Germaniyadagi oʻnta kompaniyadan yettitasi kuchli tahdidni his qiladi, analog va raqamli hujumlar qurboni boʻlish ehtimolini inkor etmaydi, deb yozadi WirtschaftsWoche iqtisodiy gazetasi.
Xalqaro mojarolar va tizimli raqobat iqtisodiyotdagi xavfsizlik holatiga tobora taʼsir oʻtkazmoqda. “Kiberjosuslik va kiberjinoyat oʻrtasidagi aloqalar kuchayishda davom etmoqda”, - deya taʼkidladi ekspert hisobotni taqdim etar ekan. “Bundan tashqari, biz raqamli va analog hujumlar oʻrtasida yanada yaqinroq aloqani koʻrmoqdamiz”, dedi u.
2023-yil sentyabr oyida Bitkom IT-birlashmasi Germaniya iqtisodiyoti maʼlumotlar oʻgʻirlanishidan 200 milliard yevrodan koʻproq zarar koʻrgani haqida xabar berdi. Aksariyat kiberhujumlar Rossiya va Xitoy manfaatlaridan kelib chiqqan holda hakerlar tomonidan amalga oshirilgan.
YEI Telegram foydalanuvchilar soni kamaytirib koʻrsatgani ehtimolini tekshirmoqda
Yevrokomissiyaning fan va axborot xizmati - Qoʻshma tadqiqot markazi Telegram messenjeri rahbariyati Yevropa tartib-qoidalariga tushib qolmaslik uchun Yevropa Ittifoqidagi oʻz foydalanuvchilari sonini kam koʻrsatishi ehtimolini tekshirmoqda. Bu haqda 28-avgust kuni Financial Times nashri xabar berdi.
Fevral oyida Telegram Yevropa Ittifoqida 41 million oylik foydalanuvchiga ega ekanligini maʼlum qilgandi. Yevropa Ittifoqi qonunlariga koʻra, messenjer avgust oyida yangilangan maʼlumotlarni taqdim etishi kerak, biroq buni qilmadi va Yevropa Ittifoqidagi oylik auditoriyasi “45 milliondan sezilarli darajada kam” degan bayonot bilan cheklandi. Biroq, Bryussel bunday emas deb gumon qilmoqda va tekshiruv belgilangan chegaradan oshib ketganligini koʻrsatishi mumkin.
Fevral oyida kuchga kirgan yangi Yevropa Ittifoqining raqamli xizmatlar toʻgʻrisidagi qonuniga (Digital Services Act, DSA) koʻra, Yevropa Ittifoqida oylik 45 milliondan ortiq foydalanuvchisi boʻlgan onlayn platformalar va ijtimoiy tarmoqlar, birinchi navbatda, foydalanuvchilar uchun xavfli boʻlgan noqonuniy kontentni moderatsiya qilishi kerak, shuningdek, soʻrov boʻyicha Yevropa komissiyasiga oʻz maʼlumotlarini taqdim etishga majbur. Mutaxassislarning taxminicha, Telegram rahbariyati ushbu qoidalarga tushib qolmaslik uchun Yevropa Ittifoqidagi foydalanuvchilari sonini ataylab kam koʻrsatgan, deb yozadi Financial Times.
