Ilon Mask 1 mlrd dollarlik xaridi bilan bozorni qo‘zg‘atib yubordi

Ilon Mask Tesla aksiyalariga 1 milliard dollar sarflab, kompaniyani yana bosh marraga qaytarish niyatida ekanini amalda ko‘rsatdi. Bu harakat Tesla aksiyalarini bir kunda 6 foizga oshirdi.

Tesla asoschisi Ilon Mask oxirgi marta 2020-yilda bozordan aksiya xarid qilgan edi. Joriy xarid — 2,57 million aksiya uchun umumiy 1 milliard dollar atrofidagi to‘lov — kompaniyaning keyingi rejalari uchun muhim signal sifatida qabul qilindi. Maskning aytishicha, u aksiyalarni 372,37 dollardan 396,54 dollargacha bo‘lgan narxlarda olgan.

Bu harakat Tesla uchun hal qiluvchi pallaga to‘g‘ri kelmoqda. Kompaniya sun’iy intellekt va robototexnika singari yangi yo‘nalishlarga jiddiy kirib bormoqda. Biroq, bir vaqtning o‘zida elektromobillar savdosi sekinlashmoqda, raqobat va ishlab chiqarish xarajatlari esa o‘smoqda.

Mask ushbu xarid orqali nafaqat bozorga ishonch uyg‘otdi, balki o‘zining Tesla ustidan katta nazoratga ega bo‘lish istagini ham yana bir bor aniq ko‘rsatdi. Yaqinda kuzatuv kengashi uning talablarini inobatga olgan holda 1 trln dollarlik kompensatsiya rejasini taklif etdi. Mask esa avvalroq, agar ovoz berish huquqi 25 foizgacha yetmasa, AI va robot loyihalarini Tesla’dan tashqarida amalga oshirishini ma’lum qilgan edi.

Hargreaves Lansdown tahlilchisi Mett Britsman buni «Tesla–Mask rivoji yana o‘z yo‘liga tushganining eng kuchli signali» sifatida baholadi. Unga ko‘ra, Maskning bozorga qaytishi investorlar uchun aniq ishonch manbai bo‘ladi. Tesla aksiyalari yil boshidan beri yo‘qotgan qiymatini qoplashga harakat qilmoqda.