Prezident tomonidan imzolangan Qonun (OʻRQ-967-son, 27.09.2024-y.) bilan “Aholi bandligi toʻgʻrisida”gi Qonunga oʻzgartirish va qoʻshimchalar kiritildi.
Unga koʻra, ish qidirayotgan shaxslarning mehnat organlariga ortiqcha hujjatlar taqdim etishiga yoʻl qoʻyilmasligini, bandlikni ragʻbatlantirish va tadbirkorlikka jalb etish uchun subsidiyalar taqdim etish mexanizmi takomillashtirilishini nazarda tutuvchi oʻzgartirish va qoʻshimchalar kiritilmoqda.
Shuningdek, ish beruvchilar tomonidan mahalliy mehnat organlariga boʻsh (vakant) ish oʻrinlari mavjudligi toʻgʻrisidagi ma'lumotlarni, xodimlarning ishdan boʻlgʻusi ozod etilishi haqidagi axborotni har oyda elektron tarzda taqdim etish shartlari belgilanmoqda.
Bundan tashqari, Kambagʻallikni qisqartirish va bandlik vazirligining hamda Iqtisodiyot va moliya vazirligining nomlanishi aniqlashtirilmoqda, shuningdek oilaviy (maishiy) zoʻravonlikdan jabrlangan shaxslar aholining ijtimoiy jihatdan ehtiyojmand toifasiga kiritilmoqda.
Qonun rasmiy e'lon qilingan kundan e'tiboran kuchga kiradi.
